qurbani-e-sarwar ki haqiqat hi alag hai

qurbānī-e-sarvar kī haqīqat hī alag hai

ai dosto ye rāz-e-mashiyyat hī alag hai

karbal se jo niklā hai bahattar ke lahū se

is chashma-e-rahmat kī fazīlat hī alag hai

yuuñ to ka.ī logoñ ne dī kalime kī shahādat

asġhar ne jo dī hai vo shahādat hī alag hai

sar par hai qazā aur laboñ par haiñ duā.eñ

karbal meñ bahattar kī jamā.at hī alag hai

sab jaan bachāte haiñ magar haq pe ye diiñ jaañ

ye āl-e-payambar kī rivāyat hī alag hai

qurbān meñ sau jaan se tujh par ġham-e-shabbīr

andāz mirā terī badaulat hī alag hai

duniyā ke har ik ġham se tujhe degā rihā.ī

'tāhir' ġham-e-shabbīr kī 'azmat hī alag hai

qurbani-e-sarwar ki haqiqat hi alag hai

ai dosto ye raaz-e-mashiyyat hi alag hai

karbal se jo nikla hai bahattar ke lahu se

is chashma-e-rahmat ki fazilat hi alag hai

yun to kai logon ne di kalime ki shahadat

asghar ne jo di hai wo shahadat hi alag hai

sar par hai qaza aur labon par hain duaen

karbal mein bahattar ki jamaat hi alag hai

sab jaan bachate hain magar haq pe ye din jaan

ye aal-e-payambar ki riwayat hi alag hai

qurban mein sau jaan se tujh par gham-e-shabbir

andaz mera teri badaulat hi alag hai

duniya ke har ek gham se tujhe dega rihai

'tahir' gham-e-shabbir ki 'azmat hi alag hai