ek aah-e-be-nawa hai ’abid ke aansuon mein

ik āh-e-be-navā hai ’ābid ke āñsuoñ meñ

zālim tirī qazā hai ’ābid ke āñsuoñ meñ

dīn-e-nabī kā gulshan un āñsuoñ meñ sīñchā

islām kī baqā hai ’ābid ke āñsuoñ meñ

jo sabr chāhtā hai parvardigār-e-'ālam

vo sabr boltā hai ’ābid ke āñsuoñ meñ

har ashk kah rahā hai ik dukh-bharī kahānī

ġharqāb karbalā hai ’ābid ke āñsuoñ meñ

daurān-e-ġham tavakkul allāh par hī rakho

ye bhī sabaq chhupā hai ’ābid ke āñsuoñ meñ

har sub.h de rahī hai ġham se bharī sadā.eñ

har shaam be-ridā hai ’ābid ke āñsuoñ meñ

daur-e-yazīdiyat ko 'tāhir' zarā batā do

paiġhām maut kā hai ’ābid ke āñsuoñ meñ

ek aah-e-be-nawa hai ’abid ke aansuon mein

zalim teri qaza hai ’abid ke aansuon mein

din-e-nabi ka gulshan un aansuon mein sincha

islam ki baqa hai ’abid ke aansuon mein

jo sabr chahta hai parwardigar-e-'alam

wo sabr bolta hai ’abid ke aansuon mein

har ashk kah raha hai ek dukh-bhari kahani

gharqab karbala hai ’abid ke aansuon mein

dauran-e-gham tawakkul allah par hi rakho

ye bhi sabaq chhupa hai ’abid ke aansuon mein

har subh de rahi hai gham se bhari sadaen

har sham be-rida hai ’abid ke aansuon mein

daur-e-yazidiyat ko 'tahir' zara bata do

paigham maut ka hai ’abid ke aansuon mein