dil-o-nigah mein ghaiz-o-ghazab to hoga hi

dil-o-nigāh meñ ġhaiz-o-ġhazab to hogā hī

nazar se girne kā ehsās ab to hogā hī

use dikhā.ūñgā ā.īna us kī mahfil meñ

mire rafīq meñ pās-e-adab to hogā hī

ḳhulūs pyaar taġhāful karam gile shikve

mizāj-e-yār salāmat ye sab to hogā hī

garebāñ chaak qadam bahke bahke nam āñkheñ

hamāre haal kā koī sabab to hogā hī

use gale se lagā lo haqīr mat samjho

ġharīb kā koī nām-o-nasab to hogā hī

mizāj dekho kināroñ kā kitnā braham hai

nadī ke paas koī tishna-lab to hogā hī

'tamīm' merī sadāqat burī lagī hogī

mire qarīb koī bū-lahab to hogā hī

dil-o-nigah mein ghaiz-o-ghazab to hoga hi

nazar se girne ka ehsas ab to hoga hi

use dikhaunga aaina us ki mahfil mein

mere rafiq mein pas-e-adab to hoga hi

KHulus pyar taghaful karam gile shikwe

mizaj-e-yar salamat ye sab to hoga hi

gareban chaak qadam bahke bahke nam aankhen

hamare haal ka koi sabab to hoga hi

use gale se laga lo haqir mat samjho

gharib ka koi nam-o-nasab to hoga hi

mizaj dekho kinaron ka kitna braham hai

nadi ke pas koi tishna-lab to hoga hi

'tamim' meri sadaqat buri lagi hogi

mere qarib koi bu-lahab to hoga hi