kamal is mein to hai teri dastaras ka bhi

kamāl is meñ to hai terī dastaras kā bhī

vagarna kaam nahīñ ye kisī ke bas kā bhī

yaqīn ham ko bhī thā tum na sah sakoge use

hamārā dard nahīñ hai kisī ke bas kā bhī

tire ḳhayāl ke mānind uḌtā phirtā hai

parinda apnā nahīñ hai kisī qafas kā bhī

hamāre jhunD meñ lagtā hai tanhā tanhā sā

kabūtar aayā hai uḌ kar tire kalas kā bhī

baġhair us ke mukammal nahīñ hikāyat-e-gul

kiyā hai zikr mohabbat meñ ḳhār-o-ḳhas kā bhī

chaman meñ phir se nayā inqalāb laane ko

bahut hai aaj yahāñ saath aaTh das kā bhī

tavajjoh terī use chāhai ‘tamīm’ bahut

ye dil hamārā hai muhtāj dād-ras kā bhī

kamal is mein to hai teri dastaras ka bhi

wagarna kaam nahin ye kisi ke bas ka bhi

yaqin hum ko bhi tha tum na sah sakoge use

hamara dard nahin hai kisi ke bas ka bhi

tere KHayal ke manind uDta phirta hai

parinda apna nahin hai kisi qafas ka bhi

hamare jhunD mein lagta hai tanha tanha sa

kabutar aaya hai uD kar tere kalas ka bhi

baghair us ke mukammal nahin hikayat-e-gul

kiya hai zikr mohabbat mein KHar-o-KHas ka bhi

chaman mein phir se naya inqalab lane ko

bahut hai aaj yahan sath aaTh das ka bhi

tawajjoh teri use chahai ‘tamim’ bahut

ye dil hamara hai muhtaj dad-ras ka bhi