tere hairat-zadagan aur kahan jate hain

tere hairat-zadagāñ aur kahāñ jaate haiñ

kahiye gar aap se jaate haiñ to haañ jaate haiñ

ve nahīñ ham ki tire jaur se uTh jaate haiñ

jī hai jab lag nahīñ ai jān-e-jahāñ jaate haiñ

kaun vo qābil-e-kushtan hai batāo ham ko

aap jo us pe liye tīr-o-kamāñ jaate haiñ

jyuuñ nagīñ rū-siyahī naam se yaañ hāsil hai

nāmvar ve haiñ jo benām-o-nishāñ jaate haiñ

sañg-e-hastī se ki thā māne-e-rāh-e-maqsūd

jast kar misl-e-sharar garm ravāñ jaate haiñ

tujh ko fahmīd kahāñ shaiḳh ki samjhe ye ramz

vaañ nahīñ bār-e-malak yaar jahāñ jaate haiñ

mujh ko us tifl-e-parī-rū ne kiyā dīvāna

hosh se dekh jise pīr-o-javāñ jaate haiñ

ġhair-e-jauhar nahīñ e'rāz se un ko kuchh kaam

rañg-o-bū par nahīñ sāhib-nazarāñ jaate haiñ

ḳhvāb 'bedār' musāfir ke nahīñ haq meñ ḳhuub

kuchh bhī hai tujh ko ḳhabar ham-safarāñ jaate haiñ

tere hairat-zadagan aur kahan jate hain

kahiye gar aap se jate hain to han jate hain

we nahin hum ki tere jaur se uTh jate hain

ji hai jab lag nahin ai jaan-e-jahan jate hain

kaun wo qabil-e-kushtan hai batao hum ko

aap jo us pe liye tir-o-kaman jate hain

jyun nagin ru-siyahi nam se yan hasil hai

namwar we hain jo benam-o-nishan jate hain

sang-e-hasti se ki tha mane-e-rah-e-maqsud

jast kar misl-e-sharar garm rawan jate hain

tujh ko fahmid kahan shaiKH ki samjhe ye ramz

wan nahin bar-e-malak yar jahan jate hain

mujh ko us tifl-e-pari-ru ne kiya diwana

hosh se dekh jise pir-o-jawan jate hain

ghair-e-jauhar nahin e'raaz se un ko kuchh kaam

rang-o-bu par nahin sahib-nazaran jate hain

KHwab 'bedar' musafir ke nahin haq mein KHub

kuchh bhi hai tujh ko KHabar ham-safaran jate hain