tere jaane ka wo manzar dilruba achchha laga

tere jaane kā vo manzar dilrubā achchhā lagā

raah meñ muḌ muḌ ke terā dekhnā achchhā lagā

mujh ko apnāne se pahle mere baare meñ tirā

baiTh kar tanhā.iyoñ meñ sochnā achchhā lagā

der se aane pe mere terī dilkash barhamī

vo ḳhafā honā tirā vo rūThnā achchhā lagā

tū ne jo tasvīr ke badle meñ bhejā thā gulāb

tujh sā vo tohfa tirā mujh ko baḌā achchhā lagā

vo nashīlī aañkh vo mastī kā aalam dekh kar

ruḳh pe tere gesūoñ kā jhūmnā achchhā lagā

thā vo tere pyaar kī pakkī nishānī is liye

sohnī mujh ko tirā kachchā ghaḌā achchhā lagā

ruuTh jaane par mire mujh ko manāne ke liye

ro ke 'purnam' haath us kā joḌnā achchhā lagā

tere jaane ka wo manzar dilruba achchha laga

rah mein muD muD ke tera dekhna achchha laga

mujh ko apnane se pahle mere bare mein tera

baiTh kar tanhaiyon mein sochna achchha laga

der se aane pe mere teri dilkash barhami

wo KHafa hona tera wo ruThna achchha laga

tu ne jo taswir ke badle mein bheja tha gulab

tujh sa wo tohfa tera mujh ko baDa achchha laga

wo nashili aankh wo masti ka aalam dekh kar

ruKH pe tere gesuon ka jhumna achchha laga

tha wo tere pyar ki pakki nishani is liye

sohni mujh ko tera kachcha ghaDa achchha laga

ruTh jaane par mere mujh ko manane ke liye

ro ke 'purnam' hath us ka joDna achchha laga