teri jhalak nigah ke har zawiye mein hai

terī jhalak nigāh ke har zāviye meñ hai

dekhūñ to shakl apnī mire aa.ine meñ hai

laTkī huī hai ruuh kī suulī pe zindagī

sāñsoñ kā silsila hai ki rassī gale meñ hai

kāñToñ kī pyaas ne mujhe khīñchā barahna-pā

jaise bharī sabīl har ik aable meñ hai

sāñsoñ kī oT le ke chalā huuñ charāġh-e-dil

siine meñ jo nahīñ vo ghuTan rāste meñ hai

merī sadā ke phuul chaḌhāte haiñ mujh pe log

zinda to huuñ magar mirā fan maqbare meñ hai

Dālūñ kahāñ paḌāv ki raste bhī haiñ ravāñ

manzil kahāñ mile ki vo ḳhud qāfile meñ hai

maiñ tujh ko chāhtā huuñ go hāsil na kar sakūñ

lazzat vo qurb meñ kahāñ jo fāsle meñ hai

paayā sila ye tujh ko 'muzaffar' ne DhūñDh kar

shāmil ab us kā naam bhī tere pate meñ hai

teri jhalak nigah ke har zawiye mein hai

dekhun to shakl apni mere aaine mein hai

laTki hui hai ruh ki suli pe zindagi

sanson ka silsila hai ki rassi gale mein hai

kanTon ki pyas ne mujhe khincha barahna-pa

jaise bhari sabil har ek aable mein hai

sanson ki oT le ke chala hun charagh-e-dil

sine mein jo nahin wo ghuTan raste mein hai

meri sada ke phul chaDhate hain mujh pe log

zinda to hun magar mera fan maqbare mein hai

Dalun kahan paDaw ki raste bhi hain rawan

manzil kahan mile ki wo KHud qafile mein hai

main tujh ko chahta hun go hasil na kar sakun

lazzat wo qurb mein kahan jo fasle mein hai

paya sila ye tujh ko 'muzaffar' ne DhunDh kar

shamil ab us ka nam bhi tere pate mein hai