tera hijab uThana hai sirf mera kaam

tirā hijāb uThānā hai sirf merā kaam

agrche hai mirī hastī tire hijāb kā naam

mire fusūñ ne dikhā.ī hai tere ruḳh kī sahar

mire junūñ ne banā.ī hai terī zulf kī shaam

ye kā.ināt zamān-o-makāñ safar hī safar

na 'āshiqī mirī manzil na husn terā maqām

har ik maqām meñ hoshiyāriyoñ kī daad na chaah

ye ġhaflateñ bhī haiñ apnī jagah baḌā in'ām

tirī nigāh kī mastī se dil hai āvāra

huā ḳharāb isī mai-kade meñ merā jaam

tire karam kā bahut shukriya magar ai dost

baġhair fasal kī bārish hai dil ko terā payām

faqīh hech hai 'maikash' se terī har hujjat

vo aap apnā muqallid hai aap apnā imaam

tera hijab uThana hai sirf mera kaam

agrche hai meri hasti tere hijab ka nam

mere fusun ne dikhai hai tere ruKH ki sahar

mere junun ne banai hai teri zulf ki sham

ye kainat zaman-o-makan safar hi safar

na 'ashiqi meri manzil na husn tera maqam

har ek maqam mein hoshiyariyon ki dad na chah

ye ghaflaten bhi hain apni jagah baDa in'am

teri nigah ki masti se dil hai aawara

hua KHarab isi mai-kade mein mera jam

tere karam ka bahut shukriya magar ai dost

baghair fasal ki barish hai dil ko tera payam

faqih hech hai 'maikash' se teri har hujjat

wo aap apna muqallid hai aap apna imam