tere kuche ka rahnuma chahta hun

tire kūche kā rahnumā chāhtā huuñ

magar ġhair kā naqsh-e-pā chāhtā huuñ

jahāñ tak ho tujh se jafā chāhtā huuñ

ki maiñ imtihān-e-vafā chāhtā huuñ

maiñ jalva tirā barmalā chāhtā huuñ

ki parde kī sūrat uThā chāhtā huuñ

ḳhudā se tirā chāhnā chāhtā huuñ

merā chāhnā dekh kyā chāhtā huuñ

kahāñ rañg-e-vahdat kahāñ zauq-e-vaslat

maiñ apne ko tujh se judā chāhtā huuñ

barābar rahī hadd-e-yār-o-mohabbat

kisī ko maiñ be-intihā chāhtā huuñ

kahāñ hai tirī barq-e-josh-e-tajallī

ki maiñ sāz-o-barg-e-fanā chāhtā huuñ

vo jab kho chuke apnī hastī se mujh ko

to kahte haiñ ab maiñ milā chāhtā huuñ

tumhāre sivā kuchh jo ab sūjhtā ho

par is se bhī maiñ kuchh sivā chāhtā huuñ

mohammad kī ummat ko taqlīd-e-mūsā

magar maiñ bhī ab kuchh sunā chāhtā huuñ

junūn-e-mohabbat meñ pand-e-adū kyā

bhalā maiñ kisī kā burā chāhtā huuñ

tabī.at kī mushkil-pasandī to dekho

hasīnoñ se tark-e-vafā chāhtā huuñ

jo dil maiñ ne chāhā to kyā ḳhaak chāhā

ki dil bhī to be-mudda.ā chāhtā huuñ

ye hasrat kī lazzat ye zauq-e-tamannā

shab-e-vasl un se hayā chāhtā huuñ

sivā is ke maiñ kyā kahūñ tum se 'āsī'

ki darvesh ho tum duā chāhtā huuñ

tere kuche ka rahnuma chahta hun

magar ghair ka naqsh-e-pa chahta hun

jahan tak ho tujh se jafa chahta hun

ki main imtihan-e-wafa chahta hun

main jalwa tera barmala chahta hun

ki parde ki surat uTha chahta hun

KHuda se tera chahna chahta hun

mera chahna dekh kya chahta hun

kahan rang-e-wahdat kahan zauq-e-waslat

main apne ko tujh se juda chahta hun

barabar rahi hadd-e-yar-o-mohabbat

kisi ko main be-intiha chahta hun

kahan hai teri barq-e-josh-e-tajalli

ki main saz-o-barg-e-fana chahta hun

wo jab kho chuke apni hasti se mujh ko

to kahte hain ab main mila chahta hun

tumhaare siwa kuchh jo ab sujhta ho

par is se bhi main kuchh siwa chahta hun

mohammad ki ummat ko taqlid-e-musa

magar main bhi ab kuchh suna chahta hun

junun-e-mohabbat mein pand-e-adu kya

bhala main kisi ka bura chahta hun

tabiat ki mushkil-pasandi to dekho

hasinon se tark-e-wafa chahta hun

jo dil main ne chaha to kya KHak chaha

ki dil bhi to be-muddaa chahta hun

ye hasrat ki lazzat ye zauq-e-tamanna

shab-e-wasl un se haya chahta hun

siwa is ke main kya kahun tum se 'asi'

ki darwesh ho tum dua chahta hun