ulfaton ke daere achchhe lage

ulfatoñ ke dā.ere achchhe lage

chāhatoñ ke silsile achchhe lage

hijr kulfat dard-e-paiham iztirāb

dard ke sab zāviye achchhe lage

taare ginnā ashk se karnā vuzū

ishq tere rut jage achchhe lage

ziist ke dariyā meñ sat.h-e-āb par

ranj-o-ġham ke bulbule achchhe lage

hasratoñ kī laash rakh kar sāmne

paḌhnā us par marsiye achchhe lage

ek se māñgā hazāroñ ne diye

muft ke ye mashvare achchhe lage

shā.irī tasnīf ḳhidmat qaum kī

mujh ko tīnoñ mashġhale achchhe lage

zindagī meñ saath chalne ke liye

aap jaise manchale achchhe lage

apnī manzil kī rakhe na jo ḳhabar

kis tarah vo qāfile achchhe lage

shah-e-jahāñ tum ko mubārak taaj ho

ham ko apne maqbare achhe lage

sun ke ahmad kī ġhazal vo kah uThe

ye radīf-o-qāfiye achchhe lage

ulfaton ke daere achchhe lage

chahaton ke silsile achchhe lage

hijr kulfat dard-e-paiham iztirab

dard ke sab zawiye achchhe lage

tare ginna ashk se karna wuzu

ishq tere rut jage achchhe lage

zist ke dariya mein sath-e-ab par

ranj-o-gham ke bulbule achchhe lage

hasraton ki lash rakh kar samne

paDhna us par marsiye achchhe lage

ek se manga hazaron ne diye

muft ke ye mashware achchhe lage

shairi tasnif KHidmat qaum ki

mujh ko tinon mashghale achchhe lage

zindagi mein sath chalne ke liye

aap jaise manchale achchhe lage

apni manzil ki rakhe na jo KHabar

kis tarah wo qafile achchhe lage

shah-e-jahan tum ko mubarak taj ho

hum ko apne maqbare achhe lage

sun ke ahmad ki ghazal wo kah uThe

ye radif-o-qafiye achchhe lage