ishq-o-junun mein qalb ye na-shad rah gaya

ishq-o-junūñ meñ qalb ye nā-shād rah gayā

jo bhūlnā thā mujh ko vahī yaad rah gayā

miTtī nahīñ hai ishq-o-mohabbat kī dāstāñ

sab kī zabāñ pe qissa-e-farhād rah gayā

phāñsī kā phandā chuum ke aage jo maiñ baḌhā

maqtal meñ mujh ko dekhtā jallād rah gayā

manzar-e-husain saare nigāhoñ se haT ga.e

āñkhoñ meñ sirf paikar-e-shamshād rah gayā

barbādī-e-nasīb se barbād to huā

bār-e-alam uThāne ko ābād rah gayā

un ke sitam ke aage hamesha yahi huā

siina hamārā sūrat-e-faulād rah gayā

zālim ne ek bhī na sunī us ke rū-ba-rū

karatā huā maiñ minnat-o-farhād rah gayā

tār-e-qafas ko toḌ ke āzād ho ga.ī

chiḌiye kā haal dekhtā sayyād rah gayā

ishq-o-junun mein qalb ye na-shad rah gaya

jo bhulna tha mujh ko wahi yaad rah gaya

miTti nahin hai ishq-o-mohabbat ki dastan

sab ki zaban pe qissa-e-farhad rah gaya

phansi ka phanda chum ke aage jo main baDha

maqtal mein mujh ko dekhta jallad rah gaya

manzar-e-husain sare nigahon se haT gae

aankhon mein sirf paikar-e-shamshad rah gaya

barbaadi-e-nasib se barbaad to hua

bar-e-alam uThane ko aabaad rah gaya

un ke sitam ke aage hamesha yahi hua

sina hamara surat-e-faulad rah gaya

zalim ne ek bhi na suni us ke ru-ba-ru

karata hua main minnat-o-farhad rah gaya

tar-e-qafas ko toD ke aazad ho gai

chiDiye ka haal dekhta sayyaad rah gaya