lazim hai tammul tujhe taqrir se pahle

lāzim hai ta'ammul tujhe taqrīr se pahle

tahqīq se tanqīd se tahrīr se pahle

insāf milā ba.ad meñ lekin vo adhūrā

maiñ qatl huā zulm kī shamshīr se pahle

ai muft ke muftī tu zarā hosh meñ rahnā

sau baar hazar chāhiye takfīr se pahle

insāf ke mandir pe kare kaun bharosa

detā hai sazā aaj jo taqsīr se pahle

ābād hameñ honā hai barbād to ho leñ

taḳhrīb bhī kuchh chāhiye ta.amīr se pahle

ye daur qalam kā hai qalam kā hai zamāna

hāthoñ meñ qalam lījiye shamshīr se pahle

har aan rahe payash-e-nazar ye bhī haqīqat

miltā nahīñ kuchh vaqt se taqdīr se pahle

ai kaash duāoñ meñ mirī aisā asar ho

maqsūd mile nāla-e-shab-gīr se pahle

is mulak ko ye tāj-mahal kis ne diyā hai

ik shāh-e-jahāñ ibn-e-jahāñgīr se pahle

duniyā kī sitam-koshī se ghabrāo na yaaro

tahqīr huā kartī hai tauqīr se pahle

dushman ke kaleje ko hilā dījiye 'ahmad'

jañgoñ meñ sadā nāra-e-takbīr se pahle

lazim hai ta'ammul tujhe taqrir se pahle

tahqiq se tanqid se tahrir se pahle

insaf mila baad mein lekin wo adhura

main qatl hua zulm ki shamshir se pahle

ai muft ke mufti tu zara hosh mein rahna

sau bar hazar chahiye takfir se pahle

insaf ke mandir pe kare kaun bharosa

deta hai saza aaj jo taqsir se pahle

aabaad hamein hona hai barbaad to ho len

taKHrib bhi kuchh chahiye tamir se pahle

ye daur qalam ka hai qalam ka hai zamana

hathon mein qalam lijiye shamshir se pahle

har aan rahe payash-e-nazar ye bhi haqiqat

milta nahin kuchh waqt se taqdir se pahle

ai kash duaon mein meri aisa asar ho

maqsud mile nala-e-shab-gir se pahle

is mulak ko ye taj-mahal kis ne diya hai

ek shah-e-jahan ibn-e-jahangir se pahle

duniya ki sitam-koshi se ghabrao na yaro

tahqir hua karti hai tauqir se pahle

dushman ke kaleje ko hila dijiye 'ahmad'

jangon mein sada nara-e-takbir se pahle