tujh sa na tha koi na koi hai hasin kahin

tujh sā na thā koī na koī hai hasīñ kahīñ

tū be-misāl hai tirā saanī nahīñ kahīñ

apnā junūñ meñ madd-e-muqābil nahīñ kahīñ

dāman kahīñ jeb kahīñ āstīñ kahīñ

zāhid ke sāmne jo ho vo nāznīñ kahīñ

dil ho kahīñ huzūr kā duniyā-o-dīñ kahīñ

ik tere āstāñ pe jhukī hai hazār baar

varna kahāñ jhukī hai hamārī jabīñ kahīñ

dil kā lagāo dil kī lagī dil lagī nahīñ

aisā na ho ki dil hī luTā deñ hamiñ kahīñ

kyā kahiye kis taraf ga.e jalve bikher ke

vo sāmne to the abhī mere yahīñ kahīñ

guzregī ab to khūcha-e-jānāñ meñ zindagī

rahnā paḌegā ab hameñ jā kar vahīñ kahīñ

dil se to haiñ qarīb jo āñkhoñ se duur haiñ

maujūd aas paas haiñ vo bil-yaqīñ kahīñ

nazroñ kī aur baat hai dil kī hai aur baat

bāteñ jo mere dil meñ haiñ ab tak nahīñ kahīñ

ai taaza vāridān-e-chaman hoshiyār baash

bijlī chamak rahī hai chaman ke qarīñ kahīñ

merā zamīr apnī jagah par hai mutma.in

apnā samajh ke un se jo bāteñ kahīñ kahīñ

dil ne bahut kahā ki tumheñ mehrbāñ kahūñ

is Dar se chup rahā ki na kah do nahīñ kahīñ

aate hī ham to khūcha-e-jānāñ meñ luT ga.e

dil kho gayā 'nasīr' hamārā yahīñ kahīñ

tujh sa na tha koi na koi hai hasin kahin

tu be-misal hai tera sani nahin kahin

apna junun mein madd-e-muqabil nahin kahin

daman kahin jeb kahin aastin kahin

zahid ke samne jo ho wo naznin kahin

dil ho kahin huzur ka duniya-o-din kahin

ek tere aastan pe jhuki hai hazar bar

warna kahan jhuki hai hamari jabin kahin

dil ka lagao dil ki lagi dil lagi nahin

aisa na ho ki dil hi luTa den hamin kahin

kya kahiye kis taraf gae jalwe bikher ke

wo samne to the abhi mere yahin kahin

guzregi ab to khucha-e-jaanan mein zindagi

rahna paDega ab hamein ja kar wahin kahin

dil se to hain qarib jo aankhon se dur hain

maujud aas pas hain wo bil-yaqin kahin

nazron ki aur baat hai dil ki hai aur baat

baaten jo mere dil mein hain ab tak nahin kahin

ai taza waridan-e-chaman hoshiyar bash

bijli chamak rahi hai chaman ke qarin kahin

mera zamir apni jagah par hai mutmain

apna samajh ke un se jo baaten kahin kahin

dil ne bahut kaha ki tumhein mehrban kahun

is Dar se chup raha ki na kah do nahin kahin

aate hi hum to khucha-e-jaanan mein luT gae

dil kho gaya 'nasir' hamara yahin kahin