tumko kahte hain ki aashiq ki fughan sunte ho

tum ko kahte haiñ ki āshiq kī fuġhāñ sunte ho

ye to kahne hī kī bāteñ haiñ kahāñ sunte ho

chaah kā zikr tumhārī maiñ kiyā kis aage

kaun kahtā hai kaho kis kī zabāñ sunte ho

kashish-e-ishq hī laa.ī hai tumheñ yaañ varna

aap se thā na mujhe ye to gumāñ sunte ho

ek shab merā bhī afsāna-e-jāñ-soz suno

qisse auroñ ke to ai jān-e-jahāñ sunte ho

vo gul-andām jo aayā to ḳhajālat se tamām

zard ho jāoge ai lāla-ruḳhāñ sunte ho

ek ke laakh sunā.ūñgā ḳhabar-dār raho

is taraf aa.ī agar tab-e-ravāñ sunte ho

aaj kyā hai kaho kyuuñ aise ḳhafā baiThe ho

apnī kahte ho na merī hī miyāñ sunte ho

kaun hai kis se karūñ dard-e-dil apnā iz.hār

chāhtā huuñ ki suno tum to kahāñ sunte ho

ye vahī shoḳh hai aatā hai jo 'bedār' ke saath

jis ko ġhārat-gar-e-dil āfat-e-jāñ sunte ho

tum ko kahte hain ki aashiq ki fughan sunte ho

ye to kahne hi ki baaten hain kahan sunte ho

chah ka zikr tumhaari main kiya kis aage

kaun kahta hai kaho kis ki zaban sunte ho

kashish-e-ishq hi lai hai tumhein yan warna

aap se tha na mujhe ye to guman sunte ho

ek shab mera bhi afsana-e-jaan-soz suno

qisse auron ke to ai jaan-e-jahan sunte ho

wo gul-andam jo aaya to KHajalat se tamam

zard ho jaoge ai lala-ruKHan sunte ho

ek ke lakh sunaunga KHabar-dar raho

is taraf aai agar tab-e-rawan sunte ho

aaj kya hai kaho kyun aise KHafa baiThe ho

apni kahte ho na meri hi miyan sunte ho

kaun hai kis se karun dard-e-dil apna izhaar

chahta hun ki suno tum to kahan sunte ho

ye wahi shoKH hai aata hai jo 'bedar' ke sath

jis ko ghaarat-gar-e-dil aafat-e-jaan sunte ho