main kya kahun teri qurbat ka kis kis ko yahan paigham mila

maiñ kyā kahūñ terī qurbat kā kis kis ko yahāñ paiġhām milā

har zarra kalīm-e-shauq banā har shai ko lutf-e-kalām milā

mai-ḳhāna-e-fitrat ke saaqī ye zarf tirā ye fayyāzī

jo tishna nahīñ mahfil meñ tirī us ko bhī chhalaktā jaam milā

irfāñ ke darīche aise khile har parda uThā har jahl miTā

har sū nazar aa.e jalve tire har samt nayā paiġhām milā

aise bhī muqaddar vaale thī duniyā meñ hazāroñ lākhoñ jinheñ

tū din ko milā tū shab ko milā tū sub.h milā tū shaam milā

kaliyoñ kī chaTak meñ terī sadā phūloñ kī mahak meñ terī adā

har shāḳh meñ terī lachak dekhī har barg pe terā naam milā

ai chāra-gar har rañj-o-alam tū vāqa.ī jān-e-hikmat hai

aate hī zabāñ par naam tirā taskīn huī ārām milā

jo baat samajh se bāhar thī vo baat samajh meñ aa ke rahī

tū ilm-o-yaqīñ kī duniyā meñ taġhlīt kun auhām milā

main kya kahun teri qurbat ka kis kis ko yahan paigham mila

har zarra kalim-e-shauq bana har shai ko lutf-e-kalam mila

mai-KHana-e-fitrat ke saqi ye zarf tera ye fayyazi

jo tishna nahin mahfil mein teri us ko bhi chhalakta jam mila

irfan ke dariche aise khile har parda uTha har jahl miTa

har su nazar aae jalwe tere har samt naya paigham mila

aise bhi muqaddar wale thi duniya mein hazaron lakhon jinhen

tu din ko mila tu shab ko mila tu subh mila tu sham mila

kaliyon ki chaTak mein teri sada phulon ki mahak mein teri ada

har shaKH mein teri lachak dekhi har barg pe tera nam mila

ai chaara-gar har ranj-o-alam tu waqai jaan-e-hikmat hai

aate hi zaban par nam tera taskin hui aaram mila

jo baat samajh se bahar thi wo baat samajh mein aa ke rahi

tu ilm-o-yaqin ki duniya mein taghlit kun auham mila