tu hi hai mera yaqin mera din mera shuhud

tū hī hai merā yaqīñ merā diiñ merā shuhūd

tire sivā kisī shai kī numūd hai na vujūd

yaqīñ kufr pe kāfir ko hai tire na huā

tū hī haqīqat-e-bātil tū hī 'adam kā vujūd

har ik hijāb se niklī navā-e-illallāh

kamāl-e-kufr ne chheḌā jo sāz-e-lā-maujūd

har ek samt tirā ruḳh har ek ruḳh tirī zaat

karūñ maiñ kis kī taraf pusht kis kī samt sujūd

junūñ ko sajda-e-be-sar mirā mubārak ho

vo terā jalva-e-be-samt phir huā mash.hūd

nigāh pher ke mujh se tujhe sukūñ na milā

tirī nazar kī nazar 'ishq bhī nahīñ mahdūd

vahī hai 'maikash'-e-nākām terā dīvāna

rahā haram se jo mahrūm dair se mardūd

tu hi hai mera yaqin mera din mera shuhud

tere siwa kisi shai ki numud hai na wujud

yaqin kufr pe kafir ko hai tere na hua

tu hi haqiqat-e-baatil tu hi 'adam ka wujud

har ek hijab se nikli nawa-e-illallah

kamal-e-kufr ne chheDa jo saz-e-la-maujud

har ek samt tera ruKH har ek ruKH teri zat

karun main kis ki taraf pusht kis ki samt sujud

junun ko sajda-e-be-sar mera mubarak ho

wo tera jalwa-e-be-samt phir hua mashhud

nigah pher ke mujh se tujhe sukun na mila

teri nazar ki nazar 'ishq bhi nahin mahdud

wahi hai 'maikash'-e-nakaam tera diwana

raha haram se jo mahrūm dair se mardud