tu ne apna jalwa dikhane ko jo naqab munh se uTha diya

tū ne apnā jalva dikhāne ko jo naqāb muñh se uThā diyā

hu.vī mahv-e-hairat-e-be-ḳhudī mujhe ā.īna sā banā diyā

vo jo naqsh-e-pā kī tarah hī thī numūd apne vajūd kī

so kashish se dāman-e-nāz ne use bhī zamīñ se miTā diyā

kyā hī chain ḳhvāb-e-’adam meñ thā na thā zulf-e-yār kā kuchh ḳhayāl

so jagā ke shor-e-zuhūr ne mujhe kis balā meñ phañsā diyā

zarā chhup nigāh-e-raqīb se paḌī us galī meñ thī merī ḳhaak

tū ne ek jhoñke meñ ai sabā use le vahāñ se uḌā diyā

rag-o-pai meñ aag bhaḌak uThī phūñke hai paḌā sabhī tan-badan

mujhe sāqiyā mai-e-ātishīñ kā ye jaam kaisā pilā diyā

ye nihāl sho.ala-e-husn kā terā baḌh ke sar-ba-falak huā

merī kāh-e-hastī se mushta.il havā se ye na nashv-o-numā diyā

jab hī jaake maktab-e-ishq meñ sabaq-e-maqām-e-fanā liyā

jo likhā paḌhā thā 'niyāz' ne so vo saaf dil se bhulā diyā

tu ne apna jalwa dikhane ko jo naqab munh se uTha diya

huwi mahw-e-hairat-e-be-KHudi mujhe aaina sa bana diya

wo jo naqsh-e-pa ki tarah hi thi numud apne wajud ki

so kashish se daman-e-naz ne use bhi zamin se miTa diya

kya hi chain KHwab-e-’adam mein tha na tha zulf-e-yar ka kuchh KHayal

so jaga ke shor-e-zuhur ne mujhe kis bala mein phansa diya

zara chhup nigah-e-raqib se paDi us gali mein thi meri KHak

tu ne ek jhonke mein ai saba use le wahan se uDa diya

rag-o-pai mein aag bhaDak uThi phunke hai paDa sabhi tan-badan

mujhe saqiya mai-e-atishin ka ye jam kaisa pila diya

ye nihaal shoala-e-husn ka tera baDh ke sar-ba-falak hua

meri kah-e-hasti se mushtail hawa se ye na nashw-o-numa diya

jab hi jake maktab-e-ishq mein sabaq-e-maqam-e-fana liya

jo likha paDha tha 'niyaz' ne so wo saf dil se bhula diya