tu sukun nahin ki aman nahin tu dawa nahin ki dua nahin

tū sukūñ nahīñ ki amaañ nahīñ tū davā nahīñ ki du'ā nahīñ

mirī zindagī ko badal na de tirī kaun sī vo adā nahīñ

tū ḳhudā nahīñ to nahīñ sahī tū magar ḳhudā se judā nahīñ

koī mujh ko itnā batā to de tire dar pe sajda ravā nahīñ

tirā raaz dil pe na khul sakā jo khulā to bhed yahī khulā

na milā use na malegā tū tirī zaat meñ jo fanā nahīñ

mujhe kyuuñ talāsh-e-haram rahe mujhe kyuuñ ho dair kī justujū

tire 'aks-e-ruḳh kī tajalliyāñ koī dil meñ jalva-numā nahīñ

tire ġham ne mujh ko jilā diyā tirī yaad ne ye dikhā diyā

tū alag nahīñ maiñ alag nahīñ tū judā nahīñ maiñ judā nahīñ

mai-josh-o-jazba-o-dard-o-ġham rah-e-shauq ishq-e-asar-talab

tire 'āshiqoñ ko tirī qasam tire dar se kyā kyā milā nahīñ

ba-ḳhudā mujhe ye qubūl hai ba-ḳhudā mujhe ye yaqīn hai

mire dard-o-ġham kī koī davā tire āstāñ ke sivā nahīñ

tu sukun nahin ki aman nahin tu dawa nahin ki du'a nahin

meri zindagi ko badal na de teri kaun si wo ada nahin

tu KHuda nahin to nahin sahi tu magar KHuda se juda nahin

koi mujh ko itna bata to de tere dar pe sajda rawa nahin

tera raaz dil pe na khul saka jo khula to bhed yahi khula

na mila use na malega tu teri zat mein jo fana nahin

mujhe kyun talash-e-haram rahe mujhe kyun ho dair ki justuju

tere 'aks-e-ruKH ki tajalliyan koi dil mein jalwa-numa nahin

tere gham ne mujh ko jila diya teri yaad ne ye dikha diya

tu alag nahin main alag nahin tu juda nahin main juda nahin

mai-josh-o-jazba-o-dard-o-gham rah-e-shauq ishq-e-asar-talab

tere 'ashiqon ko teri qasam tere dar se kya kya mila nahin

ba-KHuda mujhe ye qubul hai ba-KHuda mujhe ye yaqin hai

mere dard-o-gham ki koi dawa tere aastan ke siwa nahin