uDa kar rakh diye purze jigar ke

uḌā kar rakh diye purze jigar ke

ajī bal jā.iye teġh-e-nazar ke

ye hālat ho ga.ī zulfoñ meñ phañs kar

ki ab mehmān haiñ ham rāt-bhar ke

ḳhudā-hāfiz hai us gul kī kamar kā

ġhazab jhoñke chale bād-e-sahar ke

na tum ne qadr kuchh āshiq kī jaanī

bahut ro.o.ge ab tum yaad kar ke

ajī dil meñ utar aao kisī din

mirī āñkhoñ par apne paañv dhar ke

dam-e-āḳhir to siine se lipaT jā

koī jiitā nahīñ ai jaan mar ke

lahad meñ tum na chheḌo ai farishto

satā.e haiñ kisī ke umr-bhar ke

na jab tak us ko chhātī se lagāyā

ġhazab sadme rahe dard-e-jigar ke

bane aañsū phaphūle sūrat-e-sham.a

jalā.e haiñ ham apnī chashm-e-tar ke

ba-rañg-e-sham.a ThanDā bhī kar ai sub.h

jalā.e haiñ kisī ke rāt-bhar ke

ġham-e-dañdāñ meñ vo lāġhar hue ham

ki haiñ tār-e-nazar chashm-e-guhar ke

ḳhudā-hāfiz tire bīmār kā hai

ki ab ġhash aate haiñ do-do-pahar ke

kahīñ to dil-jigar jalne lagegā

na suniye merī aaheñ kaan dhar ke

dam-e-āḳhir diye us but ne bose

vo bose the ki the toshe safar ke

kahīñ phir choT khaa.ī tum ne 'āsī'

bahut rote ho dil par haath dhar ke

uDa kar rakh diye purze jigar ke

aji bal jaiye tegh-e-nazar ke

ye haalat ho gai zulfon mein phans kar

ki ab mehman hain hum raat-bhar ke

KHuda-hafiz hai us gul ki kamar ka

ghazab jhonke chale baad-e-sahar ke

na tum ne qadr kuchh aashiq ki jaani

bahut rooge ab tum yaad kar ke

aji dil mein utar aao kisi din

meri aankhon par apne panw dhar ke

dam-e-aKHir to sine se lipaT ja

koi jita nahin ai jaan mar ke

lahad mein tum na chheDo ai farishto

satae hain kisi ke umr-bhar ke

na jab tak us ko chhati se lagaya

ghazab sadme rahe dard-e-jigar ke

bane aansu phaphule surat-e-shama

jalae hain hum apnī chashm-e-tar ke

ba-rang-e-shama ThanDa bhi kar ai subh

jalae hain kisi ke raat-bhar ke

gham-e-dandan mein wo laghar hue hum

ki hain tar-e-nazar chashm-e-guhar ke

KHuda-hafiz tere bimar ka hai

ki ab ghash aate hain do-do-pahar ke

kahin to dil-jigar jalne lagega

na suniye meri aahen kan dhar ke

dam-e-aKHir diye us but ne bose

wo bose the ki the toshe safar ke

kahin phir choT khai tum ne 'asi'

bahut rote ho dil par hath dhar ke