ye jalwa kisi ka hai samaya mere dil mein

ye jalva kisī kā hai samāyā mire dil meñ

āñkhoñ meñ jo sūrat hai to naqsha mire dil meñ

jis kā na nishāñ kā’ba-o-but-ḳhāna meñ paayā

vo shoḳh sarāpā nazar aayā mire dil meñ

hai shauq meñ dīdār ke har sañg se zāhir

barq sharar-e-tūr kā jalvā mire dil meñ

jaañ tan meñ hai aur jaan meñ jānāñ kī hai tasvīr

sho.ala meñ ziyā aur vo sho.ala mire dil meñ

kyuuñ san’at-e-be-chūnī-e-sān.e.a pe na duuñ jaan

qatra meñ vo dariyā hai vo dariyā mire dil meñ

yaksāñ haiñ rah-e-’ishq meñ ye kufr aur islām

ka.aba mire dil meñ hai kalīsā mire dil meñ

ai kāfir-e-bad-kesh kabhī rahm bhī farmā

aa jā mirī āñkhoñ meñ samā jā mire dil meñ

har aan na.ī shaan hai us yaar kī 'rūhī'

hotā hai tamāsha pe tamāsha mire dil meñ

ye jalwa kisi ka hai samaya mere dil mein

aankhon mein jo surat hai to naqsha mere dil mein

jis ka na nishan ka’ba-o-but-KHana mein paya

wo shoKH sarapa nazar aaya mere dil mein

hai shauq mein didar ke har sang se zahir

barq sharar-e-tur ka jalwa mere dil mein

jaan tan mein hai aur jaan mein jaanan ki hai taswir

shoala mein ziya aur wo shoala mere dil mein

kyun san’at-e-be-chuni-e-sanea pe na dun jaan

qatra mein wo dariya hai wo dariya mere dil mein

yaksan hain rah-e-’ishq mein ye kufr aur islam

kaba mere dil mein hai kalisa mere dil mein

ai kafir-e-bad-kesh kabhi rahm bhi farma

aa ja meri aankhon mein sama ja mere dil mein

har aan nai shan hai us yar ki 'ruhi'

hota hai tamasha pe tamasha mere dil mein