یہ جلوہ کسی کا ہے سمایا مرے دل میں

یہ جلوہ کسی کا ہے سمایا مرے دل میں

آنکھوں میں جو صورت ہے تو نقشہ مرے دل میں

جس کا نہ نشاں کعبہ و بت خانہ میں پایا

وہ شوخ سراپا نظر آیا مرے دل میں

ہے شوق میں دیدار کے ہر سنگ سے ظاہر

برق شرر طور کا جلوا مرے دل میں

جاں تن میں ہے اور جان میں جاناں کی ہے تصویر

شعلہ میں ضیا اور وہ شعلہ مرے دل میں

کیوں صنعت بے چونیٔ صانع پہ نہ دوں جان

قطرہ میں وہ دریا ہے وہ دریا مرے دل میں

یکساں ہیں رہ عشق میں یہ کفر اور اسلام

کعبہ مرے دل میں ہے کلیسا مرے دل میں

اے کافر بدکیش کبھی رحم بھی فرما

آ جا مری آنکھوں میں سما جا مرے دل میں

ہر آن نئی شان ہے اس یار کی روحیؔ

ہوتا ہے تماشہ پہ تماشہ مرے دل میں