saqi ko kis ne mujhse bezar kar diya hai

saaqī ko kis ne mujh se bezār kar diyā hai

aane se mai-kada meñ inkār kar diyā hai

ye mai-kada na chhoḌūñ saaqī se muñh na moḌūñ

mastān-e-mā’rifat ne hushyār kar diyā hai

bhar de koī pyālī dar se na pher ḳhālī

kausar kā haq ne tujh ko muḳhtār kar diyā hai

dar par tire paḌā huuñ kis jā yahāñ se jā.ūñ

apnoñ se tuune mujh ko bezār kar diyā hai

ābād mai-kada ho saaqī tirā bhalā ho

ulfat kā jaam de kar sarshār kar diyā hai

ġhaflat meñ so rahe the gumrāh ho rahe the

saaqī ne ruḳh dikhā kar dīñdār kar diyā hai

uTTheñge roz-e-mahshar ham naam terā le kar

de de ke tū ne sāġhar sarshār kar diyā hai

mansūr ko pilā kar sar-mast use banā kar

phir daar par chaḌhā kar sardār kar diyā hai

saaqī mirā nirālā kā'ba kā rahne vaalā

ho us kā bol baalā sarshār kar diyā hai

jām-e-sharāb bhar de mastāna mujh ko kar de

sab mai-kashoñ kā tujh ko sardār kar diyā hai

hai mai-kada sharī'at bhar tū bhī jām-e-vahdat

akbar ne tujh ko 'ahmad' mai-ḳhvār kar diyā hai

saqi ko kis ne mujh se bezar kar diya hai

aane se mai-kada mein inkar kar diya hai

ye mai-kada na chhoDun saqi se munh na moDun

mastan-e-ma’rifat ne hushyar kar diya hai

bhar de koi pyali dar se na pher KHali

kausar ka haq ne tujh ko muKHtar kar diya hai

dar par tere paDa hun kis ja yahan se jaun

apnon se tune mujh ko bezar kar diya hai

aabaad mai-kada ho saqi tera bhala ho

ulfat ka jam de kar sarshaar kar diya hai

ghaflat mein so rahe the gumrah ho rahe the

saqi ne ruKH dikha kar dindar kar diya hai

uTThenge roz-e-mahshar hum nam tera le kar

de de ke tu ne saghar sarshaar kar diya hai

mansur ko pila kar sar-mast use bana kar

phir dar par chaDha kar sardar kar diya hai

saqi mera nirala ka'ba ka rahne wala

ho us ka bol baala sarshaar kar diya hai

jam-e-sharab bhar de mastana mujh ko kar de

sab mai-kashon ka tujh ko sardar kar diya hai

hai mai-kada shari'at bhar tu bhi jam-e-wahdat

akbar ne tujh ko 'ahmad' mai-KHwar kar diya hai