ahad mein ahmad ka hai ye naqsha ki yar mujh mein main yar mein hun

ahad meñ ahmad kā hai ye naqsha ki yaar mujh meñ maiñ yaar meñ huuñ

nahīñ yahāñ naam bhī duī kā ki yaar mujh meñ maiñ yaar meñ huuñ

'ajab tarah kā hai kuchh tamāshā ki yaar mujh meñ maiñ yaar meñ huuñ

ye Dhañg 'ālam se hai nirālā ki yaar mujh meñ maiñ yaar meñ huuñ

jo vo hai mā'shūq maiñ huuñ 'āshiq jo maiñ huuñ maḳhlūq vo hai ḳhāliq

magar haiñ malzūm-o-lāzim ek jā ki yaar mujh meñ maiñ yaar meñ huuñ

tamām 'ālam meñ us ko DhūñDā magar kahīñ kuchh pata na paayā

jo chashm-e-vahdat se maiñ ne dekhā ki yaar mujh meñ maiñ yaar meñ huuñ

vo hai gul-e-tar to maiñ huuñ ḳhushbū maiñ ā.īna tū vo ā.īna-rū

na maiñ judā vo na mujh se bichhḌā ki yaar mujh meñ maiñ yaar meñ huuñ

na fasl kī kuchh jagah hai aslan na vasl kahne kā kuchh hai mauqa'

kahāñ kā mel aur farq kaisā ki yaar mujh meñ maiñ yaar meñ huuñ

agar huuñ maiñ aab to vo gul hai agar huuñ maiñ jaan to vo dil hai

hue haiñ par donoñ mil ke yakjā ki yaar mujh meñ maiñ yaar meñ huuñ

ye bāteñ 'mahfūz' vohī samjhe nigāh murshid kī jis pe hove

har ek kyā jaane ye mu'ammā ki yaar mujh meñ maiñ yaar meñ huuñ

ahad mein ahmad ka hai ye naqsha ki yar mujh mein main yar mein hun

nahin yahan nam bhi dui ka ki yar mujh mein main yar mein hun

'ajab tarah ka hai kuchh tamasha ki yar mujh mein main yar mein hun

ye Dhang 'alam se hai nirala ki yar mujh mein main yar mein hun

jo wo hai ma'shuq main hun 'ashiq jo main hun maKHluq wo hai KHaliq

magar hain malzum-o-lazim ek ja ki yar mujh mein main yar mein hun

tamam 'alam mein us ko DhunDa magar kahin kuchh pata na paya

jo chashm-e-wahdat se main ne dekha ki yar mujh mein main yar mein hun

wo hai gul-e-tar to main hun KHushbu main aaina tu wo aaina-ru

na main juda wo na mujh se bichhDa ki yar mujh mein main yar mein hun

na fasl ki kuchh jagah hai aslan na wasl kahne ka kuchh hai mauqa'

kahan ka mel aur farq kaisa ki yar mujh mein main yar mein hun

agar hun main aab to wo gul hai agar hun main jaan to wo dil hai

hue hain par donon mil ke yakja ki yar mujh mein main yar mein hun

ye baaten 'mahfuz' wohi samjhe nigah murshid ki jis pe howe

har ek kya jaane ye mu'amma ki yar mujh mein main yar mein hun