kisi mashuq kamsin ki shararat hone wali hai

kisī ma.ashūq kamsin kī sharārat hone vaalī hai

hamāre dil pe ab ġham kī hukūmat hone vaalī hai

kisī ko ham se dar-parda mohabbat hone vaalī hai

hamāre ishq kī duniyā meñ shohrat hone vaalī hai

chaḌhā kar āstīñ maqtal meñ yuuñ bolā but-e-qātil

kisī ko aaj un hāthoñ se jannat hone vaalī hai

gale mil-mil ke kyuuñ armān-o-hasrat rote haiñ bāham

tamannā-e-dilī kyā aaj ruḳhsat hone vaalī hai

tirī tirchhī nigāheñ kah rahī haiñ saaf ai zālim

mohabbat ġhair se ham se adāvat hone vaalī hai

ḳhushī kyuuñ kar na ho jiine se baḌh kar mujh ko marne kī

tasavvur meñ kisī ke apnī rehlat hone vaalī hai

kahīñ sach ho kahīñ sach ho ilāhī un kā ye kahnā

ki ‘sharmā’ par bhī ab chashm-e-'ināyat hone vaalī hai

kisi mashuq kamsin ki shararat hone wali hai

hamare dil pe ab gham ki hukumat hone wali hai

kisi ko hum se dar-parda mohabbat hone wali hai

hamare ishq ki duniya mein shohrat hone wali hai

chaDha kar aastin maqtal mein yun bola but-e-qatil

kisi ko aaj un hathon se jannat hone wali hai

gale mil-mil ke kyun arman-o-hasrat rote hain baham

tamanna-e-dili kya aaj ruKHsat hone wali hai

teri tirchhi nigahen kah rahi hain saf ai zalim

mohabbat ghair se hum se adawat hone wali hai

KHushi kyun kar na ho jine se baDh kar mujh ko marne ki

tasawwur mein kisi ke apni rehlat hone wali hai

kahin sach ho kahin sach ho ilahi un ka ye kahna

ki ‘sharma’ par bhi ab chashm-e-'inayat hone wali hai