کسی معشوق کمسن کی شرارت ہونے والی ہے

کسی معشوق کمسن کی شرارت ہونے والی ہے

ہمارے دل پہ اب غم کی حکومت ہونے والی ہے

کسی کو ہم سے در پردہ محبت ہونے والی ہے

ہمارے عشق کی دنیا میں شہرت ہونے والی ہے

چڑھا کر آستیں مقتل میں یوں بولا بت قاتل

کسی کو آج ان ہاتھوں سے جنت ہونے والی ہے

گلے مل مل کے کیوں ارمان و حسرت روتے ہیں باہم

تمنائے دلی کیا آج رخصت ہونے والی ہے

تری ترچھی نگاہیں کہہ رہی ہیں صاف اے ظالم

محبت غیر سے ہم سے عداوت ہونے والی ہے

خوشی کیوں کر نہ ہو جینے سے بڑھ کر مجھ کو مرنے کی

تصور میں کسی کے اپنی رحلت ہونے والی ہے

کہیں سچ ہو کہیں سچ ہو الٰہی ان کا یہ کہنا

کہ شرماؔ پر بھی اب چشم عنایت ہونے والی ہے