uske aaina-e-ruKHsar ko dekha maine

us ke ā.īna-ruḳhsār ko dekhā maiñ ne

ai mohabbat tire me.ayār ko dekhā maiñ ne

rāste se koī matlab thā na manzil se ġharaz

saath chal kar tirī raftār ko dekhā maiñ ne

dil kā saudā na kiyā aur na karnā thā mujhe

haañ magar naqd-e-ḳharīdār ko dekhā maiñ ne

do qadam bhī na musāfir kā diyā saath us ne

aap ke sāya-e-dīvār ko dekhā maiñ ne

apnī āshufta-mizājī pe huā mujh ko ġhurūr

jab tire gesū-e-ḳhamdār ko dekhā maiñ ne

umr bhar jhūTī ḳhushāmad kī rahī baat ūñchī

umr bhar aap ke darbār ko dekhā maiñ ne

terī bātoñ kā kise hosh hai lekin ai dost

sahr-e-chashm-o-lab-o-ukHsār ko dekhā maiñ ne

zindagī mere masā.il ke sivā aur bhī hai

aap us qulzum-e-zaḳhḳhār ko dekhā maiñ ne

kuchh batā maiñ to sahī aap kā 'maikash' to na thā

aaj ik kāfir-e-dīñ-dār ko dekhā maiñ ne

us ke aaina-ruKHsar ko dekha main ne

ai mohabbat tere meayar ko dekha main ne

raste se koi matlab tha na manzil se gharaz

sath chal kar teri raftar ko dekha main ne

dil ka sauda na kiya aur na karna tha mujhe

han magar naqd-e-KHaridar ko dekha main ne

do qadam bhi na musafir ka diya sath us ne

aap ke saya-e-diwar ko dekha main ne

apni aashufta-mizaji pe hua mujh ko ghurur

jab tere gesu-e-KHamdar ko dekha main ne

umr bhar jhuTi KHushamad ki rahi baat unchi

umr bhar aap ke darbar ko dekha main ne

teri baaton ka kise hosh hai lekin ai dost

sahr-e-chashm-o-lab-o-ukHsar ko dekha main ne

zindagi mere masail ke siwa aur bhi hai

aap us qulzum-e-zaKHKHar ko dekha main ne

kuchh bata main to sahi aap ka 'maikash' to na tha

aaj ek kafir-e-din-dar ko dekha main ne