اس کے آئینۂ رخسار کو دیکھا میں نے

اس کے آئینہ رخسار کو دیکھا میں نے

اے محبت ترے معیار کو دیکھا میں نے

راستے سے کوئی مطلب تھا نہ منزل سے غرض

ساتھ چل کر تری رفتار کو دیکھا میں نے

دل کا سودا نہ کیا اور نہ کرنا تھا مجھے

ہاں مگر نقد خریدار کو دیکھا میں نے

دو قدم بھی نہ مسافر کا دیا ساتھ اس نے

آپ کے سایۂ دیوار کو دیکھا میں نے

اپنی آشفتہ مزاجی پہ ہوا مجھ کو غرور

جب ترے گیسوئے خم دار کو دیکھا میں نے

عمر بھر جھوٹی خوشامد کی رہی بات اونچی

عمر بھر آپ کے دربار کو دیکھا میں نے

تیری باتوں کا کسے ہوش ہے لیکن اے دوست

سحر چشم و لب و رخسار کو دیکھا میں نے

زندگی میرے مسائل کے سوا اور بھی ہے

آپ اس قلزم ذخار کو دیکھا میں نے

کچھ بتا میں تو سہی آپ کا میکشؔ تو نہ تھا

آج اک کافر دین دار کو دیکھا میں نے