us mast-nazar ka uf re sitam jis waqt idhar ho jati hai

us mast-nazar kā uf re sitam jis vaqt idhar ho jaatī hai

majrūh jigar ho jaatā hai betāb nazar ho jaatī hai

hairāñ huuñ ki rone kī mere kis tarah ḳhabar ho jaatī hai

har shāḳh chaman meñ pichhle pahar har rose hī tar ho jaatī hai

allāh re ye dastūr-e-amal allāh re ye qānūn-e-aTal

jis samt vo nazreñ uThtī haiñ duniyā hī udhar ho jaatī hai

ik vo bhī zamāna thā apnā phūloñ pe baserā hotā thā

ik ye bhī zamāna hai apnā kāñToñ pe basar ho jaatī hai

jis shām-e-alam kī tārīkī ġham-e-dil kā farāvāñ kartī ho

us shaam kī aksar tārīkī pur-nūr sahr ho jaatī hai

ik rose qamar ban jaatā hai jis tarh mah-e-nau gardish se

us tarh mohabbat meñ dil kī har aah sharar ho jaatī hai

jo 'nūh' se nisbat rakhte haiñ lā-raib 'azīz' un kī kashtī

dam-bhar meñ idhar ho jaatī hai dam-bhar meñ udhar ho jaatī hai

us mast-nazar ka uf re sitam jis waqt idhar ho jati hai

majruh jigar ho jata hai betab nazar ho jati hai

hairan hun ki rone ki mere kis tarah KHabar ho jati hai

har shaKH chaman mein pichhle pahar har rose hi tar ho jati hai

allah re ye dastur-e-amal allah re ye qanun-e-aTal

jis samt wo nazren uThti hain duniya hi udhar ho jati hai

ek wo bhi zamana tha apna phulon pe basera hota tha

ek ye bhi zamana hai apna kanTon pe basar ho jati hai

jis sham-e-alam ki tariki gham-e-dil ka farawan karti ho

us sham ki aksar tariki pur-nur sahr ho jati hai

ek rose qamar ban jata hai jis tarh mah-e-nau gardish se

us tarh mohabbat mein dil ki har aah sharar ho jati hai

jo 'nuh' se nisbat rakhte hain la-raib 'aziz' un ki kashti

dam-bhar mein idhar ho jati hai dam-bhar mein udhar ho jati hai