اس مست نظر کا اف رے ستم جس وقت ادھر ہو جاتی ہے

اس مست نظر کا اف رے ستم جس وقت ادھر ہو جاتی ہے

مجروح جگر ہو جاتا ہے بیتاب نظر ہو جاتی ہے

حیراں ہوں کہ رونے کی میرے کس طرح خبر ہو جاتی ہے

ہر شاخ چمن میں پچھلے پہر ہر روز ہی تر ہو جاتی ہے

اللہ رے یہ دستور عمل اللہ رے یہ قانون اٹل

جس سمت وہ نظریں اٹھتی ہیں دنیا ہی ادھر ہو جاتی ہے

اک وہ بھی زمانہ تھا اپنا پھولوں پہ بسیرا ہوتا تھا

اک یہ بھی زمانہ ہے اپنا کانٹوں پہ بسر ہو جاتی ہے

جس شام الم کی تاریکی غم دل کا فراواں کرتی ہو

اس شام کی اکثر تاریکی پر نور سحر ہو جاتی ہے

اک روز قمر بن جاتا ہے جس طرح مہ نو گردش سے

اس طرح محبت میں دل کی ہر آہ شرر ہو جاتی ہے

جو نوحؔ سے نسبت رکھتے ہیں لا ریب عزیزؔ ان کی کشتی

دم بھر میں ادھر ہو جاتی ہے دم بھر میں ادھر ہو جاتی ہے