usi ke jalwe the lekin visal-e-yar na tha

usī ke jalve the lekin visāl-e-yār na thā

maiñ us ke vāste kis vaqt be-qarār na thā

koī jahān meñ kyā aur tarah-dār na thā

tirī tarah mujhe dil par to iḳhtiyār na thā

ḳhirām-e-jalva ke naqsh-e-qadam the lāla-o-gul

kuchh aur us ke sivā mausam-e-bahār na thā

vo kaun nāla-e-dil thā qafas meñ ai sayyād

ki misl-e-tīr-e-nazar āsmāñ shikār na thā

ġhalat hai hukm-e-jahannam kise huā hogā

ki mujh se baḌh ke to koī gunāhgār na thā

vafūr-e-be-ḳhudī-e-bazm-e-mai na pūchho raat

koī ba-juz nigah-e-yār hoshiyār na thā

lahad ko khol ke dekho to ab kafan bhī nahīñ

koī libās na thā jo ki musta.ār na thā

tū mahv-e-gulbun-o-gulzār ho gayā 'āsī'

tirī nazar meñ jamāl-e-ḳhayāl-e-yār na thā

usi ke jalwe the lekin visal-e-yar na tha

main us ke waste kis waqt be-qarar na tha

koi jahan mein kya aur tarah-dar na tha

teri tarah mujhe dil par to iKHtiyar na tha

ḳhirām-e-jalwa ke naqsh-e-qadam the lala-o-gul

kuchh aur us ke siwa mausam-e-bahaar na tha

wo kaun nala-e-dil tha qafas mein ai sayyaad

ki misl-e-tir-e-nazar aasman shikar na tha

ghalat hai hukm-e-jahannam kise hua hoga

ki mujh se baDh ke to koi gunahgar na tha

wafūr-e-be-ḳhudī-e-bazm-e-mai na puchho raat

koi ba-juz nigah-e-yar hoshiyar na tha

lahad ko khol ke dekho to ab kafan bhi nahin

koi libas na tha jo ki mustaar na tha

tu mahw-e-gulbun-o-gulzar ho gaya 'asi'

teri nazar mein jamal-e-KHayal-e-yar na tha