wahan mai-kashi mai-parasti rahi

vahāñ mai-kashī mai-parastī rahī

yahāñ umr bhar faaqa mastī rahī

khule kab rahe zarf-e-mai raat ko

marī ruuh saaqī tarastī rahī

hasīñ dil ko tārāj karte rahe

hamesha ujaḌtī ye bastī rahī

bikī mai bahut fasl-e-gul meñ garāñ

jo sach pūchho phir bhī ye sastī rahī

kahāñ raqs tā.ūs-e-mīnā rahā

kahāñ ai ghaTā tū barastī rahī

pilā dī thī saaqī ne kaisī mujhe

ki mahshar meñ bhī mujh ko mastī rahī

tirī zulf par log marte rahe

ye nāgin yūñhī sab ko Dastī rahī

na kuchh de sake mai-faroshoñ ko bhī

bahut un dinoñ tañg-dastī rahī

qayāmat meñ bhī un ke tarz-e-ḳhirām

qayāmat par āvāze kustī rahī

lahad par ugā bhī jo sabza kabhī

ghaTā ban ke hasrat barastī rahī

ye past-o-buland jahāñ saath haiñ

rahī ye bhī jab tak ye hastī rahī

vo bole tirī aah sozāñ 'riyāz'

hamesha tirā muñh jhulastī rahī

wahan mai-kashi mai-parasti rahi

yahan umr bhar faqa masti rahi

khule kab rahe zarf-e-mai raat ko

mari ruh saqi tarasti rahi

hasin dil ko taraj karte rahe

hamesha ujaDti ye basti rahi

biki mai bahut fasl-e-gul mein garan

jo sach puchho phir bhi ye sasti rahi

kahan raqs taus-e-mina raha

kahan ai ghaTa tu barasti rahi

pila di thi saqi ne kaisi mujhe

ki mahshar mein bhi mujh ko masti rahi

teri zulf par log marte rahe

ye nagin yunhi sab ko Dasti rahi

na kuchh de sake mai-faroshon ko bhi

bahut un dinon tang-dasti rahi

qayamat mein bhi un ke tarz-e-KHiram

qayamat par aawaze kusti rahi

lahad par uga bhi jo sabza kabhi

ghaTa ban ke hasrat barasti rahi

ye past-o-buland jahan sath hain

rahi ye bhi jab tak ye hasti rahi

wo bole teri aah sozan 'riyaz'

hamesha tera munh jhulasti rahi