wahshi the bu-e-gul ki tarah se jahan mein hum

vahshī the bū-e-gul kī tarah se jahāñ meñ ham

nikle to phir ke aa.e na apne makāñ meñ ham

shaidā-e-rū-e-gul na haiñ shaidā-e-qadd-e-sarv

sayyād ke shikār haiñ is bostāñ meñ ham

niklī laboñ se aah ki gardūñ nishāna thā

goyā ki tiir joḌe hue the kamāñ meñ ham

ālūda-e-gunāh hai apnā riyāz bhī

shab kāTte haiñ jaag ke muġh kī dukāñ meñ ham

himmat pas-e-fanā sabab-e-zikr-e-ḳhair hai

murdoñ kā naam sunte haiñ har dāstāñ meñ ham

'ātish' suḳhan kī qadr zamāne se uTh ga.ī

maqdūr ho to qufl lagā.eñ dahāñ meñ ham

wahshi the bu-e-gul ki tarah se jahan mein hum

nikle to phir ke aae na apne makan mein hum

shaida-e-ru-e-gul na hain shaida-e-qadd-e-sarw

sayyaad ke shikar hain is bostan mein hum

nikli labon se aah ki gardun nishana tha

goya ki tir joDe hue the kaman mein hum

aaluda-e-gunah hai apna riyaz bhi

shab kaTte hain jag ke mugh ki dukan mein hum

himmat pas-e-fana sabab-e-zikr-e-KHair hai

murdon ka nam sunte hain har dastan mein hum

'atish' suKHan ki qadr zamane se uTh gai

maqdur ho to qufl lagaen dahan mein hum