wasl ki shab rang-e-gardun nau-e-digar ho gaya

vasl kī shab rañg-e-gardūñ nau.-e-dīgar ho gayā

shaam se yaar aur maiñ jaame se bāhar ho gayā

us shah-e-ḳhūbāñ ko jab likhā a.rīza shauq kā

is qadar loTā humā us par kabūtar ho gayā

kū-ba-kū phirtā huuñ maiñ ḳhāna-ḳharāboñ kī tarah

jaise saude kā tire sar meñ mire ghar ho gayā

bojh hai hammāl kā qāsid se uThne kā nahīñ

tūl-e-sharh-e-shauq se maktūb daftar ho gayā

gosh-e-'ārif meñ ye goristāñ se aatī hai sadā

āsmāñ hai vah zamīñ ke jo barābar ho gayā

tere pahlū se judā hote hī ai ārām-e-jāñ

ustuḳhvāñ jo thā mire pahlū meñ ḳhanjar ho gayā

sāmnā jo paḌ gayā hosh uḌ ga.e be-ḳhud huā

jām-e-chashm-e-yār be-hoshī kā sāġhar ho gayā

ek alif se qad ke saude meñ huā 'ātish' faqīr

chaar abrū ko safā kar ke qalandar ho gayā

wasl ki shab rang-e-gardun nau-e-digar ho gaya

sham se yar aur main jame se bahar ho gaya

us shah-e-KHuban ko jab likha ariza shauq ka

is qadar loTa huma us par kabutar ho gaya

ku-ba-ku phirta hun main KHana-KHarabon ki tarah

jaise saude ka tere sar mein mere ghar ho gaya

bojh hai hammal ka qasid se uThne ka nahin

tul-e-sharh-e-shauq se maktub daftar ho gaya

gosh-e-'arif mein ye goristan se aati hai sada

aasman hai wah zamin ke jo barabar ho gaya

tere pahlu se juda hote hi ai aaram-e-jaan

ustuKHwan jo tha mere pahlu mein KHanjar ho gaya

samna jo paD gaya hosh uD gae be-KHud hua

jam-e-chashm-e-yar be-hoshi ka saghar ho gaya

ek alif se qad ke saude mein hua 'atish' faqir

chaar abru ko safa kar ke qalandar ho gaya