wo hu-haq ab kahan afsurda hai mai-KHana barson se

vo hū-haq ab kahāñ afsurda hai mai-ḳhāna barsoñ se

nahīñ qaa.em huī hai majlis rindāna barsoñ se

hai bargashta kisī kī nargis-e-mastāna barsoñ se

liye phirtā huuñ maiñ apnā tahī-paimāna barsoñ se

na aa.ī merī naubat vā-e-sāqī hā-e-mahrūmī

barābar go hai gardish meñ tirā paimāna barsoñ se

ba’īd insāf se hai ġhair ko tarjīh mujh par ho

vo 'āshiq kal huā maiñ huuñ tirā dīvāna barsoñ se

ba-juz ’ijz-o-niyāz-o-bandagī maiñ aur kyā jānūñ

ye dil hai zer-e-mashq-e-nāz-e-ma’ashūqāna barsoñ se

unheñ āḳhir mirī yaad aa.ī aur is andāz se aa.ī

nahīñ aayā hai is jānib mirā dīvāna barsoñ se

bas ab aa jā bas ab aa jā karam-farmā karam-farmā

sadā.eñ de rahā hai koī betābāna barsoñ se

surāhī dar-baġhal sāġhar-ba-kaf msatānā-vār aa jā

lagā.e aasrā baiThā hai ik mastāna barsoñ se

dil-e-pur-shauq roz is bazm meñ is tarah jaatā hai

ki dekhī ho na jaise sūrat-e-jānāna barsoñ se

kabhī majnūñ sunātā thā aur ab 'majzūb' se sun lo

chalā aatā hai duniyā meñ mirā afsāna barsoñ se

wo hu-haq ab kahan afsurda hai mai-KHana barson se

nahin qaem hui hai majlis rindana barson se

hai bargashta kisi ki nargis-e-mastana barson se

liye phirta hun main apna tahi-paimana barson se

na aai meri naubat wa-e-saqi ha-e-mahrumi

barabar go hai gardish mein tera paimana barson se

ba’id insaf se hai ghair ko tarjih mujh par ho

wo 'ashiq kal hua main hun tera diwana barson se

ba-juz ’ijz-o-niyaz-o-bandagi main aur kya jaanun

ye dil hai zer-e-mashq-e-naz-e-ma’ashuqana barson se

unhen aaKHir meri yaad aai aur is andaz se aai

nahin aaya hai is jaanib mera diwana barson se

bas ab aa ja bas ab aa ja karam-farma karam-farma

sadaen de raha hai koi betabana barson se

surahi dar-baghal saghar-ba-kaf msatana-war aa ja

lagae aasra baiTha hai ek mastana barson se

dil-e-pur-shauq roz is bazm mein is tarah jata hai

ki dekhi ho na jaise surat-e-jaanana barson se

kabhi majnun sunata tha aur ab 'majzub' se sun lo

chala aata hai duniya mein mera afsana barson se