wo jab rang-e-pareshani ko KHalwat-gir dekhenge

vo jab rañg-e-pareshānī ko ḳhalvat-gīr dekheñge

to apne har tasavvur meñ mirī tasvīr dekheñge

nazar jin kī asīr-e-halqa-e-tadbīr rahtī hai

vo kyā anjām-kār-e-vusa't-e-taqdīr dekheñge

sunā hai husn ko do-chand kar detā hai ye shīsha

lagā kar apne dil meñ aap kī tasvīr dekheñge

jinheñ hai uzr ik lafz-e-tamannā kī samā.at se

vo ik din jā-ba-jā is lafz kī tafsīr dekheñge

ma'āl-e-ahl-e-ġhaflat ho chukā bedār duniyā meñ

jo ḳhvābīda haiñ ḳhud kyā ḳhvāb kī ta.abīr dekheñge

gudāz-e-ġham se haiñ tahlīl kī nau'iyyateñ lākhoñ

vo har aañsū meñ dil kī ik na.ī tasvīr dekheñge

hisāb-e-jurm-o-naqd-e-umar sab kahne kī bāteñ haiñ

kahāñ tak vo kisī kā daftar-e-taqsīr dekheñge

shikasta har kaḌī hai har kaḌī meñ dil ke TukḌe haiñ

baḌī ibrat se dīvāne mirī zanjīr dekheñge

wo jab rang-e-pareshani ko KHalwat-gir dekhenge

to apne har tasawwur mein meri taswir dekhenge

nazar jin ki asir-e-halqa-e-tadbir rahti hai

wo kya anjam-kar-e-wusa't-e-taqdir dekhenge

suna hai husn ko do-chand kar deta hai ye shisha

laga kar apne dil mein aap ki taswir dekhenge

jinhen hai uzr ek lafz-e-tamanna ki samaat se

wo ek din ja-ba-ja is lafz ki tafsir dekhenge

ma'al-e-ahl-e-ghaflat ho chuka bedar duniya mein

jo KHwabida hain KHud kya KHwab ki tabir dekhenge

gudaz-e-gham se hain tahlil ki nau'iyyaten lakhon

wo har aansu mein dil ki ek nai taswir dekhenge

hisab-e-jurm-o-naqd-e-umar sab kahne ki baaten hain

kahan tak wo kisi ka daftar-e-taqsir dekhenge

shikasta har kaDi hai har kaDi mein dil ke TukDe hain

baDi ibrat se diwane meri zanjir dekhenge