wo kaun hai duniya mein jise gham nahin hota

vo kaun hai duniyā meñ jise ġham nahīñ hotā

kis ghar meñ ḳhushī hotī hai mātam nahīñ hotā

aise bhī haiñ duniyā meñ jinheñ ġham nahīñ hotā

ik ġham hai hamārā jo kabhī kam nahīñ hotā

tum jā ke chaman meñ gul-o-bulbul ko to dekho

kyā lutf tah-e-chādar shabnam nahīñ hotā

kyā surma bharī āñkhoñ se aañsū nahīñ girte

kyā mehñdī lage hāthoñ se mātam nahīñ hotā

uḌtī thī vo shai aatī thiiñ jannat kī havā.eñ

ab rindoñ kā jamghaT sar-e-zamzam nahīñ hotā

ye jaan ke kyuuñ ro.egā koi sar-e-turbat

sabze se judā qatra-e-shabnam nahīñ hotā

ye shān-e-gadā-e-dar-e-mai-ḳhāna hai saaqī

bhūle se vo bazm ke vo jam nahīñ hotā

māyūs-e-asar ashk-e-anā dil nahīñ hote

mānūs-e-asar giryā-e-shabnam nahīñ hotā

kuchh aur hotī haiñ bigaḌne kī adā.eñ

banñe meñ sañvarne meñ ye a.alam nahīñ hotā

taskīn to hojāye jo tū phuuT ke bah jaaye

ye tujh se bhī ai dīda-e-pur-nam nahīñ hotā

sabza mirī turbat kā rag-e-gul nahīñ bulbul

in āñsuoñ se tere to ye nam nahīñ hotā

miTte hue dekhī hai ajab husn kī tasvīr

ab koī mare mujh ko zarā ġham nahīñ hotā

vo bhī to miTe jān-e-jahāñ naam thā jin kā

ye nazm-e-jahāñ phir bhī to braham nahīñ hotā

kuchh bhī ho 'riyāz' aañkh meñ aate nahīñ aañsū

mujh ko to kisī baat kā ab ġham nahīñ hotā

wo kaun hai duniya mein jise gham nahin hota

kis ghar mein KHushi hoti hai matam nahin hota

aise bhi hain duniya mein jinhen gham nahin hota

ek gham hai hamara jo kabhi kam nahin hota

tum ja ke chaman mein gul-o-bulbul ko to dekho

kya lutf tah-e-chadar shabnam nahin hota

kya surma bhari aankhon se aansu nahin girte

kya mehndi lage hathon se matam nahin hota

uDti thi wo shai aati thin jannat ki hawaen

ab rindon ka jamghaT sar-e-zamzam nahin hota

ye jaan ke kyun roega koi sar-e-turbat

sabze se juda qatra-e-shabnam nahin hota

ye shan-e-gada-e-dar-e-mai-KHana hai saqi

bhule se wo bazm ke wo jam nahin hota

mayus-e-asar ashk-e-ana dil nahin hote

manus-e-asar girya-e-shabnam nahin hota

kuchh aur hoti hain bigaDne ki adaen

banne mein sanwarne mein ye aalam nahin hota

taskin to hojaye jo tu phuT ke bah jaye

ye tujh se bhi ai dida-e-pur-nam nahin hota

sabza meri turbat ka rag-e-gul nahin bulbul

in aansuon se tere to ye nam nahin hota

miTte hue dekhi hai ajab husn ki taswir

ab koi mare mujh ko zara gham nahin hota

wo bhi to miTe jaan-e-jahan nam tha jin ka

ye nazm-e-jahan phir bhi to braham nahin hota

kuchh bhi ho 'riyaz' aankh mein aate nahin aansu

mujh ko to kisi baat ka ab gham nahin hota