wo nazren kya milin rahat ki duniya ho gai apni

vo nazreñ kyā milīñ rāhat kī duniyā ho ga.ī apnī

mai-e-mansūr apnī hai navā-e-sarmadī apnī

manā kar hī rahī us sañg-dil ko ḳhāmushī apnī

zabān-e-be-zabānī ne dikhā dī naġhmagī apnī

na chhoḌī shauq kī vāraftagī ne kaj-ravī apnī

jidhar manzil na thī vo raah manzil ban ga.ī apnī

bhalā vo aur ham par sarf karte barhamī apnī

nigāh-e-shauq kī gustāḳhiyoñ meñ chheḌ thī apnī

hijāb-e-ishq meñ ham ne haqīqat dekh lī apnī

na apnī maut apnī hai na apnī zindagī apnī

nazar-afzoī-e-sham-e-tajallī ai zahe-qismat

kahāñ bazm-e-jamāl un kī kahāñ parvāngī apnī

ḳhushī se vo hamārī har ḳhushī pāmāl kar Dāleñ

jahāñ tak hai ḳhushī un kī vahāñ tak hai ḳhushī apnī

ye ġham ye hichkiyāñ ye ashk-e-paiham chiiz hī kyā haiñ

bahut hī Thokareñ khilvā.egī dīvāngī apnī

ḳhudā rakkhe tujhe ai muskurā kar dekhne vaale

tire ka.aba ko ai zāhid yahīñ se bandagī apnī

dil-e-vahdat-numā ne manzar-e-kasrat badal Daalā

is ā.īna meñ sūrat hai vahī un kī vahī apnī

wo nazren kya milin rahat ki duniya ho gai apni

mai-e-mansur apni hai nawa-e-sarmadi apni

mana kar hi rahi us sang-dil ko KHamushi apni

zaban-e-be-zabani ne dikha di naghmagi apni

na chhoDi shauq ki waraftagi ne kaj-rawi apni

jidhar manzil na thi wo rah manzil ban gai apni

bhala wo aur hum par sarf karte barhami apni

nigah-e-shauq ki gustaKHiyon mein chheD thi apni

hijab-e-ishq mein hum ne haqiqat dekh li apni

na apni maut apni hai na apni zindagi apni

nazar-afzoi-e-sham-e-tajalli ai zahe-qismat

kahan bazm-e-jamal un ki kahan parwangi apni

KHushi se wo hamari har KHushi pamal kar Dalen

jahan tak hai KHushi un ki wahan tak hai KHushi apni

ye gham ye hichkiyan ye ashk-e-paiham chiz hi kya hain

bahut hi Thokaren khilwaegi diwangi apni

KHuda rakkhe tujhe ai muskura kar dekhne wale

tere kaba ko ai zahid yahin se bandagi apni

dil-e-wahdat-numa ne manzar-e-kasrat badal Dala

is aaina mein surat hai wahi un ki wahi apni