teri tanhai mein maujudgi mahsus karata hun

tirī tanhā.ī meñ maujūdgī mahsūs karatā huuñ

ḳhizāñ meñ rah ke bhī ab tāzgī mahsūs karatā huuñ

ḳhudā kī ’azmatoñ kā mo'tarif huuñ sajde karatā huuñ

jabīn-e-shauq meñ raḳhshandagī mahsūs karatā huuñ

nahīñ miltā to us kī yaad meñ rahtā hai dil be-chain

malūñ jab us se to ik tāzgī mahsūs karatā huuñ

ba-zāhir us ko jaise ḳhud-numā.ī achchhī lagtī hai

qarīb aao to us meñ sādgī mahsūs karatā huuñ

ḳhafā rah kar bhī jab vo muskurā kar dekh letā hai

maiñ apne aap meñ ik zindagī mahsūs karatā huuñ

ḳhudā ke sāmne jab bhī maiñ sajda-rez hotā huuñ

to apne dil meñ ik pākīzgī mahsūs karatā huuñ

ye merā tajraba har moḌ par yuuñ kaam aatā hai

maiñ apne faisloñ meñ puḳhtagī mahsūs karatā huuñ

na vo josh-o-junūñ hai aur na kuchh īsār kā jazba

javāñ nasloñ meñ ik pazhmurdagī mahsūs karatā huuñ

juḌā hai jab se merā naam mohr-e-naqshbandī se

maiñ dil meñ ik ajab āsūdgī mahsūs karatā huuñ

‘vajāhat’ maiñ niyāzī huuñ mujhe kyā fikr duniyā kī

har ik zarre meñ sharf-e-bandadī mahsūs karatā huuñ

teri tanhai mein maujudgi mahsus karata hun

KHizan mein rah ke bhi ab tazgi mahsus karata hun

KHuda ki ’azmaton ka mo'tarif hun sajde karata hun

jabin-e-shauq mein raKHshandagi mahsus karata hun

nahin milta to us ki yaad mein rahta hai dil be-chain

malun jab us se to ek tazgi mahsus karata hun

ba-zahir us ko jaise KHud-numai achchhi lagti hai

qarib aao to us mein sadgi mahsus karata hun

KHafa rah kar bhi jab wo muskura kar dekh leta hai

main apne aap mein ek zindagi mahsus karata hun

KHuda ke samne jab bhi main sajda-rez hota hun

to apne dil mein ek pakizgi mahsus karata hun

ye mera tajraba har moD par yun kaam aata hai

main apne faislon mein puKHtagi mahsus karata hun

na wo josh-o-junun hai aur na kuchh isar ka jazba

jawan naslon mein ek pazhmurdagi mahsus karata hun

juDa hai jab se mera nam mohr-e-naqshbandi se

main dil mein ek ajab aasudgi mahsus karata hun

‘wajahat’ main niyazi hun mujhe kya fikr duniya ki

har ek zarre mein sharf-e-bandadi mahsus karata hun