har insan yahi kahta hai dekho to ab kya hota hai

har insān yahī kahtā hai dekho to ab kyā hotā hai

raste meñ dīvār khaḌī hai itnā to sab ko dikhtā hai

chāroñ-samt añdherā phailā aise meñ kyā rasta sūjhe

parbat sar par TuuT rahe haiñ paañv meñ dariyā bahtā hai

merī sundartā ke gahne chhīn ke vo kahtā hai mujh se

vo insān bahut achchhā hai jo har-hāl meñ ḳhush rahtā hai

ik chehre se pyaar karūñ maiñ ik se ḳhauf lage hai mujh ko

ik chehra ik ā.īna hai ik chehra patthar lagtā hai

maiñ taqdīr zamāne-bhar kī har insān muqaddar terā

jurm kisī kā chalte chalte mere hī sar aa paḌtā hai

kitne jalvoñ se guzrā huuñ kitne manzar dekhe maiñ ne

ab bhī aañkh se ojhal hai vo jo mere dil meñ rahtā hai

dhuup aur chhāñv se bantā hai hastī kā afsāna 'vāsif'

baḌh jaate haiñ vahm ke saa.e azm kā sūraj jab Dhaltā hai

har insan yahi kahta hai dekho to ab kya hota hai

raste mein diwar khaDi hai itna to sab ko dikhta hai

chaaron-samt andhera phaila aise mein kya rasta sujhe

parbat sar par TuT rahe hain panw mein dariya bahta hai

meri sundarta ke gahne chhin ke wo kahta hai mujh se

wo insan bahut achchha hai jo har-haal mein KHush rahta hai

ek chehre se pyar karun main ek se KHauf lage hai mujh ko

ek chehra ek aaina hai ek chehra patthar lagta hai

main taqdir zamane-bhar ki har insan muqaddar tera

jurm kisi ka chalte chalte mere hi sar aa paDta hai

kitne jalwon se guzra hun kitne manzar dekhe main ne

ab bhi aankh se ojhal hai wo jo mere dil mein rahta hai

dhup aur chhanw se banta hai hasti ka afsana 'wasif'

baDh jate hain wahm ke sae azm ka suraj jab Dhalta hai