wahi surat wahi KHud aaina hai

vahī sūrat vahī ḳhud ā.īna hai

nazar yaañ diid meñ hairat-zada hai

milā jis ko kisī gul kā patā hai

vahī is baaġh meñ phūlā phalā hai

tafāvut kahiye in donoñ meñ kyā hai

ḳhudā dariyā hai aadam bulbulā hai

kahāñ marte haiñ marne vaale haq par

jahāñ jiine pe haañ jī de rahā hai

kyā jo chāh-e-duniyā se kināra

vahī ’āmil haiñ durr-e-be-bahā hai

visāl-e-jān-e-jāñ hai jān-e-jānāñ

koī kyā jān-e-jānāñ jāntā hai

ḳhudā kahte haiñ jis ko hai muammā

na ham se muttasil hai ne judā hai

ye sab bāteñ haiñ sunte haiñ va-lekin

na yaañ banda hai koī ne ḳhudā hai

koī ā.īna-rū ā.īna ban kar

muqābil apne ik sūrat huā hai

jahāñ kahtā hai jis ko lā-ta’ayyunn

'vatan' merī vahī rahne kī jā hai

wahi surat wahi KHud aaina hai

nazar yan did mein hairat-zada hai

mila jis ko kisi gul ka pata hai

wahi is bagh mein phula phala hai

tafawut kahiye in donon mein kya hai

KHuda dariya hai aadam bulbula hai

kahan marte hain marne wale haq par

jahan jine pe han ji de raha hai

kya jo chah-e-duniya se kinara

wahi ’amil hain durr-e-be-baha hai

visal-e-jaan-e-jaan hai jaan-e-jaanan

koi kya jaan-e-jaanan jaanta hai

KHuda kahte hain jis ko hai muamma

na hum se muttasil hai ne juda hai

ye sab baaten hain sunte hain wa-lekin

na yan banda hai koi ne KHuda hai

koi aaina-ru aaina ban kar

muqabil apne ek surat hua hai

jahan kahta hai jis ko la-ta’ayyunn

'watan' meri wahi rahne ki ja hai