yaad mai-KHwaron ko gar baada-parasti hogi

yaad mai-ḳhvāroñ ko gar bāda-parastī hogī

ba.ad marne ke bhī ik joshish mastī hogī

ḳhāksāran-e-mohabbat ke jahāñ madfan haiñ

abr-e-rahmat ke evaz ḳhaak barastī hogī

qāfile yāroñ ke har rose chale jaate haiñ

bastī un logoñ kī āḳhir kahīñ bastī hogī

haq ne vo husn diyā hai tujhe o ġhairat-e-hūr

band mahram ke parī aan ke kastī hogī

ek ik bāl-e-sharaf naafe pe rakhtā hogā

choTī jab argaje ke itr meñ bastī hogī

dafn jis jā hue āshiq dil-e-sad-chāk liye

phuuT kī tarh zamīñ vaan kī biktī hogī

valvale ishq-o-mohabbat ke javānī tak haiñ

phir junūñ hogā mirī jaan na mastī hogī

hukm-e-zāhid na rahā daur hai ab saaqī kā

haq-parastī ke evaz bāda-parastī hogī

yaad rakh dekh ke duniyā ke nasheb aur farāz

ab bulandī hī jahāñ phir vahīñ pastī hogī

sham-o-gul gor pe āshiq kī kabhī le ke chalo

ruuh marhūm kī jannat meñ tarastī hogī

na kabhī hosh meñ aayā vo huuñ madhosh-e-azal

ġhaflat is be-ḳhabarī par mirī hañstī hogī

ātish-e-hijr se jal bhun ke muvā jo āshiq

laash us kī tā-madfan bhī bhulastī hogī

kaun kahtā hai ki ho jā.egī arzānī-e-husn

kabhī bāzār meñ ye jins na sastī hogī

kyuuñ na bāzīcha-e-duniyā ko kaheñ naqsh-e-fanā

ek din jānte haiñ niist ye hastī hogī

ba.ad-e-murdan jo koī ġhaur se dekhegā kabhī

be-kasī apne hī marqad par barastī hogī

bāda-ḳhvāroñ meñ jo zikr apnā bhī aayā hogā

shīshe kī tarh se mai halq meñ phañstī hogī

aazmā lījiye jab chāhe vo āshiq huuñ

uf nahii. karne kā gar aag barastī hogī

dil jigar donoñ hī mushtāq haiñ is ḳhanjar ke

siine par ḳhā.uñgā jo zarb do-dastī hogī

jalva-e-haq hai ayaañ husn se ham se vaa.iz

haq-parastī to nahīñ husn-parastī hogī

yā alī kah ke lahad meñ jo pukārūñgā 'rind'

Thahar jā.egī agar gor bhī dhañstī hoge

yaad mai-KHwaron ko gar baada-parasti hogi

baad marne ke bhi ek joshish masti hogi

KHaksaran-e-mohabbat ke jahan madfan hain

abr-e-rahmat ke ewaz KHak barasti hogi

qafile yaron ke har rose chale jate hain

basti un logon ki aaKHir kahin basti hogi

haq ne wo husn diya hai tujhe o ghairat-e-hur

band mahram ke pari aan ke kasti hogi

ek ek baal-e-sharaf nafe pe rakhta hoga

choTi jab argaje ke itr mein basti hogi

dafn jis ja hue aashiq dil-e-sad-chaak liye

phuT ki tarh zamin wan ki bikti hogi

walwale ishq-o-mohabbat ke jawani tak hain

phir junun hoga meri jaan na masti hogi

hukm-e-zahid na raha daur hai ab saqi ka

haq-parasti ke ewaz baada-parasti hogi

yaad rakh dekh ke duniya ke nasheb aur faraaz

ab bulandi hi jahan phir wahin pasti hogi

sham-o-gul gor pe aashiq ki kabhi le ke chalo

ruh marhum ki jannat mein tarasti hogi

na kabhi hosh mein aaya wo hun madhosh-e-azal

ghaflat is be-KHabari par meri hansti hogi

aatish-e-hijr se jal bhun ke muwa jo aashiq

lash us ki ta-madfan bhi bhulasti hogi

kaun kahta hai ki ho jaegi arzani-e-husn

kabhi bazar mein ye jins na sasti hogi

kyun na bazicha-e-duniya ko kahen naqsh-e-fana

ek din jaante hain nist ye hasti hogi

baad-e-murdan jo koi ghaur se dekhega kabhi

be-kasi apne hi marqad par barasti hogi

baada-KHwaron mein jo zikr apna bhi aaya hoga

shishe ki tarh se mai halq mein phansti hogi

aazma lijiye jab chahe wo aashiq hun

uf nahi karne ka gar aag barasti hogi

dil jigar donon hi mushtaq hain is KHanjar ke

sine par KHaunga jo zarb do-dasti hogi

jalwa-e-haq hai ayan husn se hum se waiz

haq-parasti to nahin husn-parasti hogi

ya ali kah ke lahad mein jo pukarunga 'rind'

Thahar jaegi agar gor bhi dhansti hoge