yas-o-hasrat ka tere baad aaina rah jaega

yās-o-hasrat kā tire ba.ad ā.īna rah jā.egā

jo bhī dekhegā mirā muñh dekhtā rah jā.egā

ek din aisā bhī hogā intizār-e-yār meñ

niiñd aa jā.egī darvāza khulā rah jā.egā

tum na jaao zīnat-e-gulshan tumhāre dam se hai

tum chale jāoge to gulshan meñ kyā rah jā.egā

phuul hañsnā chhoḌ deñge aap ke jaane ke ba.ad

ro.egī shabnam chaman ujḌā huā rah jā.egā

rāste ke pech-o-ḳham rahbar samajh le soch le

raah meñ varna bhaTak kar qāfila rah jā.egā

soch kar merī vafā.eñ mere mar jaane ke ba.ad

haath mil kar ek din vo bevafā rah jā.egā

koī duniyā meñ nahīñ aayā hamesha ke liye

bas ḳhudā kā naam hī nām-e-ḳhudā rah jā.egā

jab kabhī hogā achānak 'purnam' un kā sāmnā

band ho kar āñsuoñ kā silsila rah jā.egā

yas-o-hasrat ka tere baad aaina rah jaega

jo bhi dekhega mera munh dekhta rah jaega

ek din aisa bhi hoga intizar-e-yar mein

nind aa jaegi darwaza khula rah jaega

tum na jao zinat-e-gulshan tumhaare dam se hai

tum chale jaoge to gulshan mein kya rah jaega

phul hansna chhoD denge aap ke jaane ke baad

roegi shabnam chaman ujDa hua rah jaega

raste ke pech-o-KHam rahbar samajh le soch le

rah mein warna bhaTak kar qafila rah jaega

soch kar meri wafaen mere mar jaane ke baad

hath mil kar ek din wo bewafa rah jaega

koi duniya mein nahin aaya hamesha ke liye

bas KHuda ka nam hi nam-e-KHuda rah jaega

jab kabhi hoga achanak 'purnam' un ka samna

band ho kar aansuon ka silsila rah jaega