yahī jo sauda hai mujh hazin ka pata kahan ku-e-naznin ka

yahī jo saudā hai mujh hazīñ kā patā kahāñ kū-e-nāznīñ kā

ġhubār-āsā nahīñ kahīñ kā na āsmāñ kā na maiñ zamīñ kā

baḌhe sulaimāñ ke jitne rutbe tumhārī ulfat ke the karishme

ye naqsh jis dil meñ jam ke baiThe buland ho naam us nagīñ kā

kahāñ kā naala kahāñ kā shevan sunā.e qātil hai vaqt-e-murdan

qalam huī hai badan se gardan zabāñ pe na.ara hai āfrīñ kā

qarīb hai yaaro roz-e-mahshar chhupegā kushtoñ kā qatl kyūñkar

jo chup rahegī zabān-e-ḳhanjar lahū pukāregā āstīñ kā

ajab muraqqa.a hai bāġh-e-duniyā ki jis kā sān.e.a nahīñ huvaidā

hazār-hā sūrateñ haiñ paidā patā nahīñ sūrat-āfrīñ kā

ḳhudā se jab tak na ho shanāsā harīm-e-dil kā hai shauq be-jā

makān kā tab patā milegā ki kuchh patā yaad ho makīñ kā

kis āstāne pe jā paḌā huuñ kahāñ ilāhī maiñ jibah-sā huuñ

ki sar na uTThe hazār chāhūñ ye rabt hai sajda-o-zamīñ kā

kahāñ kā ka.aba hai dair kaisā batāo kūche kā us ke rastā

maiñ pūchhtā huuñ patā kahīñ kā nishān dete ho tum kahīñ kā

yahī jo sauda hai mujh hazin ka pata kahan ku-e-naznin ka

ghubar-asa nahin kahin ka na aasman ka na main zamin ka

baDhe sulaiman ke jitne rutbe tumhaari ulfat ke the karishme

ye naqsh jis dil mein jam ke baiThe buland ho nam us nagin ka

kahan ka nala kahan ka shewan sunae qatil hai waqt-e-murdan

qalam hui hai badan se gardan zaban pe nara hai aafrin ka

qarib hai yaro roz-e-mahshar chhupega kushton ka qatl kyunkar

jo chup rahegi zaban-e-KHanjar lahu pukarega aastin ka

ajab muraqqa hai bagh-e-duniya ki jis ka sanea nahin huwaida

hazar-ha suraten hain paida pata nahin surat-afrin ka

KHuda se jab tak na ho shanasa harim-e-dil ka hai shauq be-ja

makan ka tab pata milega ki kuchh pata yaad ho makin ka

kis aastane pe ja paDa hun kahan ilahi main jibah-sa hun

ki sar na uTThe hazar chahun ye rabt hai sajda-o-zamin ka

kahan ka kaba hai dair kaisa batao kuche ka us ke rasta

main puchhta hun pata kahin ka nishan dete ho tum kahin ka