ye jahan tujhko faqat-e-wahm-o-guman lagta hai

ye jahāñ tujh ko faqat-e-vahm-o-gumāñ lagtā hai

mujh ko har zarra yahāñ ek jahāñ lagtā hai

pech-o-ḳham raah kā rakhtā hai pareshān tujhe

mujh ko ye bhī ḳham-e-gesū-e-butāñ lagtā hai

raah kā sañg hai ik sañg-e-garāñ tere liye

mujh ko ye sañg bhī manzil kā nishāñ lagtā hai

merī nazroñ meñ hai ye abr-e-bahārī kā safīr

tujh ko chhāyā huā gulshan pe dhuāñ lagtā hai

chaal se un kī chamak uThtā hai rāhoñ kā ġhubār

mujh ko har rasta yahāñ kāhkashāñ lagtā hai

aur kuchh dam mirī āġhosh meñ ai 'aks-e-shafaq

tū mujhe nāma-bar lāla-rukHāñ lagtā hai

ye jahan tujh ko faqat-e-wahm-o-guman lagta hai

mujh ko har zarra yahan ek jahan lagta hai

pech-o-KHam rah ka rakhta hai pareshan tujhe

mujh ko ye bhi KHam-e-gesu-e-butan lagta hai

rah ka sang hai ek sang-e-garan tere liye

mujh ko ye sang bhi manzil ka nishan lagta hai

meri nazron mein hai ye abr-e-bahaari ka safir

tujh ko chhaya hua gulshan pe dhuan lagta hai

chaal se un ki chamak uThta hai rahon ka ghubar

mujh ko har rasta yahan kahkashan lagta hai

aur kuchh dam meri aaghosh mein ai 'aks-e-shafaq

tu mujhe nama-bar lala-rukHan lagta hai