یہ جہاں تجھ کو فقط وہم و گماں لگتا ہے

یہ جہاں تجھ کو فقط وہم و گماں لگتا ہے

مجھ کو ہر ذرہ یہاں ایک جہاں لگتا ہے

پیچ و خم راہ کا رکھتا ہے پریشان تجھے

مجھ کو یہ بھی خم گیسوئے بتاں لگتا ہے

راہ کا سنگ ہے اک سنگ‌ راں تیرے لیے

مجھ کو یہ سنگ بھی منزل کا نشاں لگتا ہے

میری نظروں میں ہے یہ ابر بہاری کا سفیر

تجھ کو چھایا ہوا گلشن پہ دھواں لگتا ہے

چال سے ان کی چمک اٹھتا ہے راہوں کا غبار

مجھ کو ہر رستہ یہاں کاہکشاں لگتا ہے

اور کچھ دم مری آغوش میں اے عکس شفق

تو مجھے نامہ بر لالہ رخاں لگتا ہے