ye kaise baal hain bikhre ye surat kyun bani gham ki

ye kaise baal haiñ bikhre ye sūrat kyuuñ banī ġham kī

tumhār dushmanoñ ko kyā paḌī hai mere mātam kī

ḳhudā jaane tumheñ bhī rahm aatā hai ġharīboñ par

yahāñ to aah ko mohlat nahīñ miltī koī dam kī

kahāñ jaanā hai tham-tham ko chalo aisī hī kyā jaldī

ḳhudā rakhe tumheñ tum ho nazar paḌtī hai 'ālam kī

maza us meñ hī aatā hai namak chiḌko namak chiḌko

qasam le lo nahīñ 'ādat mire zaḳhmoñ ko marham kī

na miliyegā na miliyegā to kuchh ham mar na jā.eñge

ḳhudā kā shukr hai pahle mohabbat aap ne kam kī

shikāyat kis se kījiye haaye kyā ulTā zamāna hai

baḌhāyā pyaar jab ham ne mohabbat aap ne kam kī

koī ā.īna aisā ho ki jis meñ tū nazar aa.e

zamāne bhar kā jhūTā kyā haqīqat sāġhar-e-jam kī

ghaTā.eñ dekh kar be-tāb hai bechain hai 'shā.ir'

tire qurbān ai mutrib sunā de koī mausam kī

ye kaise baal hain bikhre ye surat kyun bani gham ki

tumhaar dushmanon ko kya paDi hai mere matam ki

KHuda jaane tumhein bhi rahm aata hai gharibon par

yahan to aah ko mohlat nahin milti koi dam ki

kahan jaana hai tham-tham ko chalo aisi hi kya jaldi

KHuda rakhe tumhein tum ho nazar paDti hai 'alam ki

maza us mein hi aata hai namak chiDko namak chiDko

qasam le lo nahin 'adat mere zaKHmon ko marham ki

na miliyega na miliyega to kuchh hum mar na jaenge

KHuda ka shukr hai pahle mohabbat aap ne kam ki

shikayat kis se kijiye haye kya ulTa zamana hai

baDhaya pyar jab hum ne mohabbat aap ne kam ki

koi aaina aisa ho ki jis mein tu nazar aae

zamane bhar ka jhuTa kya haqiqat saghar-e-jam ki

ghaTaen dekh kar be-tab hai bechain hai 'shair'

tere qurban ai mutrib suna de koi mausam ki