ye muqaddar ka likha hai ab ye kaT sakta nahin

ye muqaddar kā likhā hai ab ye kaT saktā nahīñ

raah se un kī hamārā paañv jise haT saktā nahīñ

dekh kar rañg-e-chaman aañsū bahāne chāhiyeñ

kyā hamārā ḳhūn-e-dil phūloñ meñ baT saktā nahīñ

kaisī kaisī mahfileñ thiiñ kaise kaise log the

vo sunahrā daur maazī kyā palaT saktā nahīñ

dam-qadam ke saath rahtī hai zamāne kī havā

un ke qadmoñ se koī zarra lipaT saktā nahīñ

dil ke zarre muntashir hokar mile haiñ ḳhaak meñ

jo bikhar jaa.e vo shīrāza simaT saktā nahīñ

hāsidān-e-tīra-bātin se koī kah de 'nasīr'

ilm kā rutba baḌhā karatā hai ghaT saktā nahīñ

ye muqaddar ka likha hai ab ye kaT sakta nahin

rah se un ki hamara panw jise haT sakta nahin

dekh kar rang-e-chaman aansu bahane chahiyen

kya hamara KHun-e-dil phulon mein baT sakta nahin

kaisi kaisi mahfilen thin kaise kaise log the

wo sunahra daur mazi kya palaT sakta nahin

dam-qadam ke sath rahti hai zamane ki hawa

un ke qadmon se koi zarra lipaT sakta nahin

dil ke zarre muntashir hokar mile hain KHak mein

jo bikhar jae wo shiraaza simaT sakta nahin

hasidan-e-tira-baatin se koi kah de 'nasir'

ilm ka rutba baDha karata hai ghaT sakta nahin