ye sikha muddat ke baad ishq-e-butan mein dhoke uTha-uTha kar

ye sīkhā muddat ke baa'd 'ishq-e-butāñ meñ dhoke uThā-uThā kar

ki aaj se dil diyā kareñge sitam-shi'āroñ ko aazmā kar

na thā muqaddar meñ shaad honā usī kā ġham hai usī kā ronā

kabhī hamārī taraf na dekhā hamāre ḳhush-ḳhū ne muskurā kar

koī hai teġh-e-adā kā ghā.il koī hai sūrat pe terī maa.il

kiyā hai 'ālam ko tū ne bismil jamāl apnā dikhā-dikhā kar

ziyāda samjhā na mujh ko vā'iz terī nasīhat na maiñ sunūñgā

bhalā butoñ se karūñ kināra ḳhudā-ḳhudā kar ḳhudā-ḳhudā kar

tumhārā jalva hai chaar jānib tum hī batāo kahāñ nahīñ ho

qasam ḳhudā kī maiñ dekh aayā tum hī ko dair-o-haram meñ jā kar

lahad pe aayā jo baa'd murdan lagā ke Thokar ye bolā pur-fan

usī pe dā'va thā 'āshiqī kā ki bhāge duniyā se muñh chhupā kar

kahīñ na apnī ye kaifiyat ho ki shakl-e-mansūr bol uTThūñ

kiyā hai matvālā tū ne saaqī sharāb-e-vahdat pilā-pilā kar

koī hai dīvāna koī majnūñ tamām 'ālam hai terā maftūñ

ḳhudā bhī pachhtātā hogā ai but hasīñ-o-kHush-rū tujhe banā kar

jamāl-e-vāris hai ham ne dekhā liyā hai bosa bhī sañg-e-dar kā

hamārā kā'ba sanam kā ghar hai tavāf karatā huuñ jis kā jā kar

na pūchho lillāh dīñ-o-īmāñ huā huuñ banda maiñ ek but kā

hamesha 'aughaT' karūñgā sajda usī ko apnā ḳhudā banā kar

ye sikha muddat ke ba'd 'ishq-e-butan mein dhoke uTha-uTha kar

ki aaj se dil diya karenge sitam-shi'aron ko aazma kar

na tha muqaddar mein shad hona usi ka gham hai usi ka rona

kabhi hamari taraf na dekha hamare KHush-KHu ne muskura kar

koi hai tegh-e-ada ka ghail koi hai surat pe teri mail

kiya hai 'alam ko tu ne bismil jamal apna dikha-dikha kar

ziyaada samjha na mujh ko wa'iz teri nasihat na main sununga

bhala buton se karun kinara KHuda-KHuda kar KHuda-KHuda kar

tumhaara jalwa hai chaar jaanib tum hi batao kahan nahin ho

qasam KHuda ki main dekh aaya tum hi ko dair-o-haram mein ja kar

lahad pe aaya jo ba'd murdan laga ke Thokar ye bola pur-fan

usi pe da'wa tha 'ashiqi ka ki bhage duniya se munh chhupa kar

kahin na apni ye kaifiyat ho ki shakl-e-mansur bol uTThun

kiya hai matwala tu ne saqi sharab-e-wahdat pila-pila kar

koi hai diwana koi majnun tamam 'alam hai tera maftun

KHuda bhi pachhtata hoga ai but hasin-o-kHush-ru tujhe bana kar

jamal-e-waris hai hum ne dekha liya hai bosa bhi sang-e-dar ka

hamara ka'ba sanam ka ghar hai tawaf karata hun jis ka ja kar

na puchho lillah din-o-iman hua hun banda main ek but ka

hamesha 'aughaT' karunga sajda usi ko apna KHuda bana kar