din ko hain chhoD ke duniya mein giraftar abhi

diiñ ko haiñ chhoḌ ke duniyā meñ giraftār abhī

ḳhvāb-e-ġhaflat meñ magan qaum ke sardār abhī

pārsāoñ ke bhī chehre kī uḌā dī rañgat

jaane kyā kah ke gayā un se gunahgār abhī

zindagī hai to sadāqat kī himāyat meñ marv

chaḌh ke neze pe sunānā hai ye ash.ār abhī

husn-e-yūsuf ne zuleḳhā se kahā thā ik din

jazba-e-ishq ko ik aañch hai darkār abhī

sabr karte haiñ tire zulm-o-sitam sahte haiñ

hikmatan karte nahīñ tujh pe palaT-vār abhī

raqs karte hai amīroñ ke ishāroñ pe yahāñ

taḳht-e-shāhī kī tavā.if-numā sarkār abhī

ruk hī jaanā hai 'adīb' us ko achānak ik din

jaarī hai jism meñ sāñsoñ kī jo raftār abhī

din ko hain chhoD ke duniya mein giraftar abhi

KHwab-e-ghaflat mein magan qaum ke sardar abhi

parsaon ke bhi chehre ki uDa di rangat

jaane kya kah ke gaya un se gunahgar abhi

zindagi hai to sadaqat ki himayat mein marw

chaDh ke neze pe sunana hai ye ashaar abhi

husn-e-yusuf ne zuleKHa se kaha tha ek din

jazba-e-ishq ko ek aanch hai darkar abhi

sabr karte hain tere zulm-o-sitam sahte hain

hikmatan karte nahin tujh pe palaT-war abhi

raqs karte hai amiron ke ishaaron pe yahan

taKHt-e-shahi ki tawaif-numa sarkar abhi

ruk hi jaana hai 'adib' us ko achanak ek din

jari hai jism mein sanson ki jo raftar abhi