zaban hi pe hai bas kalam-e-mohabbat

zabāñ hī pe hai bas kalām-e-mohabbat

mohabbat nahīñ ye hai nām-e-mohabbat

'atā kar ilāhī ba-nām-e-mohabbat

kamāl-e-mohabbat davām-e-mohabbat

shakar-ranjiyāñ talḳh kām-e-mohabbat

zarūrī haiñ bahr-e-qiyām-e-mohabbat

are ik nazar is taraf bhī ḳhudārā

ba-pās-e-muravvat ba-nām-e-mohabbat

mohabbat ke badle mohabbat sitam hai

na le uff na le intiqām-e-mohabbat

zabāñ se vo kuchh hī kahe jaa.eñ lekin

nigah de rahī hai payām-e-mohabbat

chaḌheñ daar par yā chaḌheñ tuur par ham

rasā.ī se baalā hai bām-e-mohabbat

na hogā abad tak bhī puurā na hogā

mirā qissa-e-nā-tamām-e-mohabbat

bahut duur pahūñchā hai majzūb phir bhī

bahut duur abhī hai maqām-e-mohabbat

jo majzūb kā hai kalām-e-mohabbat

vo duniyā ko hai ik payām-e-mohabbat

ye thā kaun ġhārat-gar-e-dīn-o-īmāñ

are le diyā kis ne nām-e-mohabbat

kahāñ un kī bazm-e-tarab ke huuñ qābil

maiñ shorīda-sar talḳh kām-e-mohabbat

mohabbat ko lāzim haiñ rusvā.iyāñ bhī

muhib hī nahīñ nek nām-e-mohabbat

jo 'majzūb' ke haath meñ haath de do

to hoñ dam meñ tai sab maqām-e-mohabbat

zaban hi pe hai bas kalam-e-mohabbat

mohabbat nahin ye hai nam-e-mohabbat

'ata kar ilahi ba-nam-e-mohabbat

kamal-e-mohabbat dawam-e-mohabbat

shakar-ranjiyan talKH kaam-e-mohabbat

zaruri hain bahr-e-qiyam-e-mohabbat

are ek nazar is taraf bhi KHudara

ba-pas-e-murawwat ba-nam-e-mohabbat

mohabbat ke badle mohabbat sitam hai

na le uff na le intiqam-e-mohabbat

zaban se wo kuchh hi kahe jaen lekin

nigah de rahi hai payam-e-mohabbat

chaDhen dar par ya chaDhen tur par hum

rasai se baala hai baam-e-mohabbat

na hoga abad tak bhi pura na hoga

mera qissa-e-na-tamam-e-mohabbat

bahut dur pahuncha hai majzub phir bhi

bahut dur abhi hai maqam-e-mohabbat

jo majzub ka hai kalam-e-mohabbat

wo duniya ko hai ek payam-e-mohabbat

ye tha kaun ghaarat-gar-e-din-o-iman

are le diya kis ne nam-e-mohabbat

kahan un ki bazm-e-tarab ke hun qabil

main shorida-sar talKH kaam-e-mohabbat

mohabbat ko lazim hain ruswaiyan bhi

muhib hi nahin nek nam-e-mohabbat

jo 'majzub' ke hath mein hath de do

to hon dam mein tai sab maqam-e-mohabbat